Галоўчанка прапануе ствараць «Еўразійскі электробус». Але гэта можа быць і параход
Беларусь выступае з ініцыятывай пілотнага праекта для павелічэння долі апрацоўчай прамысловасці ў эканоміках ЕАЭС. Гэтую прапанову выказаў кіраўнік урада Беларусі Раман Галоўчанка на сустрэчы з прэзідэнтам Кыргызстана Садырам Жапаравым.
Сектар апрацоўчай прамысловасці, па словах беларускага прэм'ера, асабліва мае патрэбу ў новых укладаннях і рэалізацыі канкрэтных праектаў прамкааперацыі на ўзроўні ЕАЭС.
«Прапануем рэалізаваць пілотны праект «Еўразійскі электробус» у рамках прамысловай кааперацыі. Мяркуем, што ЕЭК глыбока пагрузіцца ў гэтае пытанне.
Дапусцім, не спадабаецца электробус, хай будзе самалёт, цягнік, параход. Усё, што заўгодна, што з'яўляецца высокатэхналагічным прадуктам і запатрабаванае эканомікамі нашых краін», — сказаў Раман Галоўчанка.
Ён выказаў надзею на тое, што ад яго ініцыятывы будзе ў захапленні бізнэс усіх пяці краін ЕАЭС. Бо, маўляў, перад эканомікамі краін рэгіёна — агульныя выклікі. Праўда, пад заходнімі санкцыямі пакуль што з гэтых пяці эканомік толькі расійская і беларуская.
Каментары