У Мінску не засталося ніводнага прыватнага дзіцячага садка, заявіла першая намесніца старшыні камітэта па адукацыі Мінгарвыканкама Людміла Барысенка.
«У Мінску няма прыватных дзіцячых садкоў — на жаль, яны не змаглі выканаць даліцэнзійныя патрабаванні. Дзяржаўныя дашкольныя ўстановы цалкам задавальняюць запыты бацькоў», — цытуе чыноўніцу агенцтва «Мінск-Навіны».
Увогуле ж, як сцвярджае Барысенка, праблемы ніякай няма: «У цэлым, у нас колькасць месцаў у дзіцячых садках большая, чым колькасць дзіцячага насельніцтва».
З прыватнымі школамі ў Мінску цяпер сітуацыя фармальна лепшая, але не нашмат. Цяпер на ўвесь горад іх засталося ўсяго тры, астатнія пазбавілі ліцэнзій. Ніякіх праблем не ўзнікла толькі ў Мінскай міжнароднай гімназіі, якую звязваюць з Ірынай Абельскай, маці Мікалая Лукашэнкі. Яна адкрылася ў 2020 годзе ў элітным пасёлку Дразды.
Каментары
першыя мае гады жыцця мы жылі ў Літве, дык бацькі аддалі мяне ў т.зв. прыватны садок - дзядуля (!) прыглядаў за некалькімі дзецьмі. натуральна, што ў сябе дома. і гэта было ў савецкія часы... а тут... 21 стыдгодзе (