Заснавальнік руандыйскага «Радыё тысячы пагоркаў» застанецца беспакараным
Суд ААН у Гаазе адмовіўся выносіць прысуд абвінавачанаму ў генацыдзе ў Руандзе Фелісьену Кабугу: яго прызналі няздольным удзельнічаць у працэсе праз псіхічнае расстройства, як паведамляе CNN.
Фелісьен Кабуга — бізнэсовец, які валодаў чайнымі плантацыямі. Ён быў сузаснавальнікам «Вольнага радыё і тэлебачання тысячы пагоркаў», якое стала рупарам прапаганды падчас генацыду ў Руандзе ў 1994 годзе. Падчас яго, па розных ацэнках, загінулі ад 500 тысяч да 1,1 мільёна чалавек.
У створаным Кабугам «Радыё тысячы пагоркаў» працавалі толькі прадстаўнікі народа хуту. У эфірах тлумачылі, як трэба забіваць, раздзяляць, гвалтаваць народ тутсі, а акрамя таго, агучваліся пайменныя спісы, каго неабходна было забіць, і месцы, дзе хаваліся тутсі. Таксама Кабугу абвінавачваюць у тым, што ён узброіў апалчэнне хуту, якое высочвала і забівала тутсі.
Кабуга збег з Руанды ў 1994 годзе і жыў па падробленых дакументах спачатку ў Афрыцы, а пазней — у Францыі. У 1997 годзе Міжнародны трыбунал выставіў яму абвінавачванні ў падбухторванні да генацыду і злачынствах супраць чалавечнасці, але 26 гадоў Кабугу не маглі знайсці. Затрымалі яго ў 2020 годзе ў прыгарадзе Парыжа.
У 2022-м у Гаазе над Фелісьенам Кабугам пачаўся суд, аднак прысуд яму вынесены не будзе. Суд ААН, грунтуючыся на інфармацыі ад медыкаў, прыняў рашэнне, што праз дэменцыю 90-гадовы абвінавачаны больш не здольны ўдзельнічаць у пасяджэннях і нават не можа толкам даглядаць сябе.
«Судовая палата лічыць, што спадар Кабуга больш не можа паўнавартасна ўдзельнічаць у судовым працэсе па яго справе», — гаворыцца ў пастанове Міжнароднага рэшткавага механізму для крымінальных трыбуналаў (IRMCT).
Пасяджэнні суда працягнуцца для вызначэння праўды і ступені віны падсуднага, але прысуд вынесены не будзе.
Каментары
то не осудят.