Ці могуць Беларускі Чырвоны Крыж выключыць з міжнароднай арганізацыі?
Пасля з'яўлення генеральнага сакратара Беларускага Чырвонага Крыжа Дзмітрыя Шаўцова на Данбасе з Z-сімволікай міжнародная федэрацыя адрэагавала на сітуацыю. «Нам не паведамілі пра гэты візіт, і мы не ўдзельнічалі ў ніякіх мерапрыемствах», — заявілі там. Украінскі Чырвоны Крыж заклікаў выключыць беларускае таварыства. Але ці можа гэта здарыцца?
Экспертка ў галіне міжнароднага права і правоў чалавека Кацярына Дэйкала заўважае: ёсць дзве арганізацыі — Міжнародны Камітэт Чырвонага Крыжа і Міжнародная федэрацыя Чырвонага Крыжа. Федэрацыя — гэта пляцоўка для ўзаемадзеяння і абмену досведам нацыянальных таварыстваў Чырвонага Крыжа (іх 191). Менавіта яна адрэагавала на сітуацыю з Шаўцовым.
«МКЧК рэпутацыйна, вядома, закранае, але трэба разумець, што Беларускі Чырвоны Крыж не з'яўляецца падраздзяленнем Міжнароднага Камітэта. Ён уваходзіць у Федэрацыю. Таму чыста аперацыйна, на ўзроўні адміністрацыйных рашэнняў МКЧК не можа ўплываць на Федэрацыю, гэта розныя арганізацыі.
Асноўны орган Федэрацыі — Генеральная асамблея, якая складаецца з прадстаўнікоў нацыянальных таварыстваў. Адно таварыства — адзін голас. Тут будзе ўсё залежаць ад таго, як павядуць сябе іншыя сябры Федэрацыі. Паводле статута сябра можна выключыць або прыпыніць сяброўства. І для таго, каб выключыць, трэба 60% галасоў сяброў Федэрацыі.
Па сутнасці рашэнне за нацыянальнымі таварыствамі іншых краін», — каментуе Кацярына Дэйкала.
Экспертка звяртае ўвагу: відавочна парушэнне асноўнага прынцыпу руху Чырвонага Крыжа — прынцыпу нейтральнасці ў дачыненні да бакоў у вайне. Астатняе патрабуе далейшага вывучэння.
Чым пагражае выключэнне? Беларускі Чырвоны Крыж у такім разе пазбавяць фінансавай дапамогі, магчымасці ўдзелу ў праграмах, права выкарыстоўваць эмблему Чырвонага Крыжа і пад гэтай назвай існаваць.
Намеснік кіраўніка Аб'яднанага пераходнага кабінета Павел Латушка кажа, што яны звяртаюць увагу міжнародных партнёраў на такія абставіны.
«Разам з тым, ініцыятыва па прыняцці канкрэтных мер рэагавання па гэтым пытанні павінна сыходзіць у першую чаргу ад тых, чыю рэпутацыю падрываюць такія дзеянні і ў адносінах да каго здзяйсняюцца магчымыя злачынствы. Я цяпер маю на ўвазе ў першую чаргу ўсе арганізацыі, якія ўваходзяць у Міжнародны рух Чырвонага Крыжа і Чырвонага Паўмесяца, а таксама дзяржаву Украіну.
Можам толькі канстатаваць, што сур'ёзных крокаў, накшталт выключэння Беларускага таварыства Чырвонага Крыжа з міжнароднага руху Чырвонага Крыжа і Чырвонага Паўмесяца, наўрад ці можна прадбачыць. Такіх прэцэдэнтаў яшчэ не было.
Аднак калі будуць устаноўлены факты прамога ўдзелу БТЧК менавіта ў масавым перамяшчэнні ўкраінскіх дзяцей з тэрыторыі Украіны ў Беларусь, дзе яны падвяргаліся ідэалагічнаму перавыхаванню (відэа сясцёр Груздзевых тут яркі прыклад), то гэта ўжо адназначна можна разглядаць як ваеннае злачынства, у якім непасрэдны ўдзел узяў кіраўнік БТЧК».
Палітык дадаў, што пры атрыманні доказаў яны будуць інфармаваць Генпракуратуру Украіны і офіс пракурора МУС.
Міжнародны Чырвоны Крыж адхрысціўся ад паездак Шаўцова на Данбас
Узначальваў выбарчыя камісіі, хоча лячыць геяў, эксперт па ўсіх пытаннях. Хто такі Дзмітрый Шаўцоў, які кіруе Беларускім Чырвоным Крыжам
Кіраўнік Беларускага Чырвонага Крыжа, які засвяціўся з Z-сімволікай, расказаў, што робіць на Данбасе
«А мы гэта канкрэтна можам зрабіць» — Шаўцоў з Чырвонага Крыжа пра ядзерную зброю
Цяпер чытаюць
«Разагнаць дармаедаў! Аддаць людзям зямлю!» Трактарыст з Хойнікаў, які цяпер жыве ў Латвіі, параўнаў сельскую гаспадарку там і ў нас18
Каментары