У космасе на 3D-прынтары надрукавалі частку чалавечага цела
На Міжнароднай касмічнай станцыі з выкарыстаннем чалавечых тканак здолелі надрукаваць меніск каленнага сустава. Гэта першы крок на шляху да выкарыстання касмічнага асяроддзя для стварэння чалавечых органаў і тканак для трансплантацыі.
Як паведамляе Bloomberg, розныя кампаніі ўжо шмат гадоў займаюцца распрацоўкамі ў сферы 3D-друкавання чалавечых органаў і тканак на Зямлі. Але пры друку ва ўмовах гравітацыі біяінжынерам часта даводзіцца альбо дадаваць хімікаты, каб тканкі заставаліся цвёрдымі, альбо друкаваць тканкі на матрыцах ці каркасах, каб забяспечыць захаванне структуры.
Амерыканская кампанія Redwire сцвярджае, што такім матэрыялам лягчэй захоўваць форму ва ўмовах космасу, што спрашчае іх выраб.
«Калі вы выключаеце гравітацыю, ствараецца асяроддзе, у якой вы можаце паспяхова будаваць тканкі і органы», — сказаў у інтэрв'ю выданню дырэктар па развіцці Redwire Майк Голд (Mike Gold).
Меніск каленнага сустава быў надрукаваны з выкарыстаннем ствалавых клетак чалавека і калагену на спецыялізаваным 3D-біяпрынтары кампаніі Redwire, які прыбыў на касмічную станцыю ў канцы 2022 года. Паводле слоў прадстаўніка кампаніі, гэта першы выпадак, калі частка чалавечага цела была надрукаваная на 3D-прынтары ў космасе з выкарыстаннем чалавечых тканак.
Надрукаваны меніск вярнуўся на Зямлю на борце капсулы SpaceX Crew Dragon 4 верасня. Так як гэта была дэманстрацыя магчымасці, Redwire не плануе перасаджваць меніск у сапраўднае калена.
Голд адмовіўся каментаваць кошт друку меніска. Ён сказаў, што план кампаніі заключаецца ў тым, каб высветліць, як вырабляць такія органы, як меніск, даступным спосабам і ў вялікіх маштабах.
Спецыялісты кампаніі выбралі меніск, бо разрывы гэтай тканкі — адна з асноўных прычын артапедычных траўмаў у вайскоўцаў.
У лістападзе Redwire адправіць на МКС больш абсталявання для біядруку. У планах — 3D-друк сардэчна-сасудзістай тканкі.
Чытайце яшчэ:
Навукоўцы стварылі першы ў свеце зародак чалавека ў лабараторыі. Як і галоўнае — навошта?
Навукоўцы хочуць лекаваць карыес з дапамогай ствалавых клетак
Навукоўцы стварылі 3D-прынтар, які друкуе пры дапамозе святла ВІДЭА
Цяпер чытаюць
«Размаўляў увесь час па-беларуску». Павел Севярынец запісаў свой першы зварот пасля вызвалення15
«Размаўляў увесь час па-беларуску». Павел Севярынец запісаў свой першы зварот пасля вызвалення
«Па-беларуску «Слана» Філіпенкі набывалі больш ахвотна, чым па-руску». Якія кнігі сёння ў топе? Інтэрв'ю з кіраўніцай выдавецтва Gutenberg Publisher44
Каментары