Сямейная драма ў Рэчыцы: пенсіянер пасварыўся з жонкай і спаліў агульнае аўто
66-гадовы пенсіянер пакрыўдзіўся на жонку за тое, што яна забараніла яму садзіцца за руль.
Здарэнне адбылося ў Рэчыцы 17 верасня познім вечарам на вуліцы Маладзёжнай ля дома №10.
Пенсіянер адкаціў машыну падалей ад стаянкі і падпаліў. Калі прыехалі пажарныя, то не падпускаў іх да ахопленага полымем аўтамабіля, пагражаючы прадметам, падобным да нажа.
Узбуджанага мужчыну супакоілі, абліўшы вадою з пажарнага шланга. З месца здарэння яго забрала міліцыя ў кайданках. Цяпер ён у бальніцы.
«З апёкамі рознай ступені цяжкасці быў шпіталізаваны ва ўстанову аховы здароўя пенсіянер 1957 года нараджэння», — паведаміла абласное ўпраўленне Міністэрства па надзвычайных сітуацыях.
Жыхары шматпавярховіка, у двары якога стаянка, гавораць, што ў аўтамабіля цалкам згарэў салон і задняя частка з багажнікам. Калі машына гарэла, то ўнутры нешта выбухнула.
Па словах відавочцаў, у ёй была каністра з гаручай вадкасцю і цудам не ўзарваўся бензабак. Уладальнік машыны падносіў да яго запальнічку.
Пра пенсіянера жыхары дома кажуць, што перыядычна ён станавіўся нервовым. З жонкай, якая забараняла яму садзіцца за руль, усчыналіся тады канфлікты.
У дзень здарэння між сужэнцамі адбылася чарговая сварка. Мужчына выгукнуў, што больш жонка машыны не ўбачыць.
Суседзі мяркуюць, што жанчыну адвадзіць мужа ад машыны падбівалі родзічы, каб самім карыстацца ёю.
«Я быў на балконе, калі ён падпальваў машыну. Яна загарэлася з салона. А потым сталі збірацца людзі, якія называлі суседа дурнем. Ён агрызаўся. Мне падалося, што нават хацеў кінуцца ў полымя, калі прыехалі пажарныя і міліцыя», — згадвае начное здарэнне відавочца.
Рэчыцкія паблікі пішуць, што жонка наважылася забраць у мужа ключы ад аўто, бо ён нервова кіраваў ёю. Сямейнай машынаю карысталіся родзічы. Гаспадар пратэставаў, а потым наважыўся спаліць аўтамабіль.
Падпальваць яго мужчына пайшоў нападпітку. Калі міліцыя прывезла яго ў бальніцу, скандаліў. Цяпер мясцовы РАУС праводзіць праверку і вырашае, ці распачынаць крымінальную справу супраць пенсіянера-падпальшчыка.
«Наша Нiва» — бастыён беларушчыны
ПАДТРЫМАЦЬГлядзіце таксама:
У Рэчыцы п'яны пасажыр забіў таксіста
У Віцебску 91-гадовая жанчына атрымала апёкі, падаграваючы чайнік на пліце
80-гадовага дзядулю, які пайшоў у лес у параднай форме, знайшлі
У Слаўгарадскім раёне ад укусу гадзюкі памёр 66-гадовы мужчына
Хто такая Алеся Пархоменка з Кіпра, якая развязала беларуска-беларускую вайну88
Хто такая Алеся Пархоменка з Кіпра, якая развязала беларуска-беларускую вайну
«Доктарка», адвакат, чалавек з камерай і некалькі дужых хлопцаў. У Петрапаўлаўскай Баршчагоўцы расійскія спецслужбы скарысталіся спецыфічным украінскім бізнэсам ваеннага часу1515
Каментары