Памяншэнне колькасці глыбокага сну можа павялічыць рызыку развіцця дэменцыі — даследаванне
Глыбокі сон лічыцца самым карысным для чалавечага мозга і яго аднаўлення. Але адсутнасць такога сну можа прывесці да вельмі непрыемных наступстваў.
Навукоўцы з дзяржаўнага ўніверсітэта Монаша ў Аўстраліі выявілі, што змяншэнне колькасці глыбокага сну ў жыцці чалавека можа прывесці да развіцця дэменцыі. Пра гэта піша выданне CNN.
Чым так карысны глыбокі сон? Гэта трэцяя і апошняя фаза сну, калі арганізм працуе над выдаленнем непажаданых ці патэнцыйна шкодных рэчываў з мозга, уключаючы бэта-амілоідны бялок (адметная прыкмета хваробы Альцгеймера). Для мозга, як кажуць навукоўцы, глыбокі сон з'яўляецца найбольш аднаўляльным.
Ці звязана скарачэнне глыбокага сну з патэнцыйнай магчымасцю захварэць на дэменцыю і наадварот? Часопіс Medical press піша, што, каб адказаць на гэтае пытанне, даследчыкі прааналізавалі сон 346 чалавек з сярэднім узростам 69 гадоў.
За ўдзельнікамі ўважліва сачылі і правяралі на наяўнасць прыкмет дэменцыі. Навукоўцы зразумелі, што ў сярэднім колькасць глыбокага сну з цягам часу і старэннем паніжаецца. З улікам такіх фактараў, як узрост, пол, гены, а таксама курэнне, кожны адсотак паніжэння глыбокага сну быў звязаны з ростам рызыкі дэменцыі на 27%.
Да гэтага часу даследчыкі не былі ўпэўненыя ў ролі глыбокага сну ў развіцці дэменцыі. Вынікі, аднак, паказваюць, што павольная страта сну можа быць фактарам рызыкі развіцця гэтай хваробы.
Цяпер чытаюць
Арыштаваны 75‑гадовы Зміцер Санько — ветэран-выдавец3
Каментары