У Бабруйску абвясцілі збор подпісаў пад зваротам да мясцовых уладаў з просьбай перагледзець рашэнне аб знішчэнні мазаікі на будынку гарадской бальніцы хуткай медыцынскай дапамогі імя Марзона. Пра тое, што мазаіка апынулася ў небяспецы, стала вядома ў пачатку гэтага года.
Пано было створана ў 1968 годзе бабруйскім мастаком Сямёнам Абрамавым і за гэтыя гады зрабілася адным з вядомых месцаў горада. Але цяпер корпус бальніцы хочуць знесці разам з ім.
«Як паведаміў прадстаўнік прадпрыемства, мазаічнае палатно не ўваходзіць у пералік гісторыка-культурных каштоўнасцяў, таму будзе дэмантавана разам з будынкам. Сам знос павінен пачацца ўжо ў адыходзячым годзе — як і было заяўлена ў планах», — прыводзіць мясцовая прэса пазіцыю Упраўлення капітальнага будаўніцтва мясцовага гарвыканкама.
Аўтары петыцыі нагадваюць, што на творы дэкаратыўна-манументальнага і манументальнага мастацтва распаўсюджваецца заканадаўства, адрознае ад таго, якое прымяняецца пры ахове гісторыка-культурнай спадчыны, і цікавяцца, ці былі выкананыя ўсе працэдуры з улікам гэтых нарматыўных актаў.
У адваротным выпадку просяць «зрабіць захады, каб не дапусціць парушэння заканадаўства і паспрыяць захаванню мазаікі праз рэканструкцыю, якая прадугледжвае перанос твора мастацтва на іншае месца або ў музейныя фонды».
Цяпер чытаюць
«Размаўляў увесь час па-беларуску». Павел Севярынец запісаў свой першы зварот пасля вызвалення15
«Размаўляў увесь час па-беларуску». Павел Севярынец запісаў свой першы зварот пасля вызвалення
«Па-беларуску «Слана» Філіпенкі набывалі больш ахвотна, чым па-руску». Якія кнігі сёння ў топе? Інтэрв'ю з кіраўніцай выдавецтва Gutenberg Publisher44
Каментары