«Самаадчуванне лепшым не робіцца». Ад Рыгора Кастусёва прыйшоў першы ліст з ПКТ
Палітык мае анкалагічную хваробу, непакоіцца аб леках, перажывае, што запланаванага спаткання так і не было.
Пра настрой Рыгора Кастусёва Радыё Свабода расказаў ягоны зяць Зміцер Антончык, які з сям’ёй жыве ў Польшчы.
«Вельмі непакоіцца наконт лекаў, якія перадаюць з волі — што могуць да яго не дайсці. Бо адчувае пагаршэнне стану ў сувязі з анкалагічнай хваробай», — кажа Антончык.
Былога старшыню Партыі БНФ і кандыдата ў прэзідэнты ў выбарах 2010 года Рыгора Кастусёва 11 лістапада перавялі ў ПКТ — памяшканне камернага тыпу, дзе рэжым утрымання нязначна мякчэйшы ад ШІЗА. Паводле сваякоў, спагнанне для яго расцягнецца на 4 месяцы. Між тым вядома, што Рыгору Кастусёву пастаўлены дыягназ анкалагічна хворага. Якое лячэнне аказваюць яму ў ПКТ калоніі, вядомай як «Воўчыя Норы», — невядома.
«Паводле плана, які склалі дактары падчас абследавання, у лістападзе-снежні яму павінны рабіць аналіз крыві. Але ці будзе ён, невядома. Вынікаў абследавання дагэтуль не паведамляюць. Ён арыентуецца на самаадчуванне, а яно не робіцца лепшым. Яшчэ вельмі спадзяецца на медычную бандэроль», — паведаміў Зміцер Антончык.
Пра ўмовы ўтрымання ў ПКТ, паводле Змітра Антончыка, Рыгор Кастусёў нічога не напісаў.
«Проста напісаў, што «пераехаў у іншае месца», і больш пра ПКТ нічога. У лісце больш пра тое, як ён чакаў спаткання. Яно было запланавана сёньня, 29 лістапада, ужо паперы былі падпісаныя, але замест гэтага ён сядзіць ў ПКТ. Вельмі шкадуе, што не ўбачыўся з роднымі.
Шмат асабістых зваротаў напісаў з гэтай прычыны. Зразумелы настрой, калі чалавек у такім фізычным стане, гэтак спадзяваўся на сустрэчу, а яна не адбылася. На маю думку, гэта таксама здзек», — мяркуе Зміцер Антончык.
Былому старшыню Партыі БНФ Рыгору Кастусёву 66 гадоў. У верасні 2022 года суд прызнаў Кастусёва вінаватым у «змове з мэтай захопу ўлады» і асудзіў на 10 гадоў зняволення. Яшчэ ў менскім СІЗА ў палітвязня дыягнаставалі анкалагічнае захворванне.
Апошняе медычнае абследаванне Кастусёў прайшоў у жніўні, але вынікаў агляду і аналізаў яму тады не паведамілі.
Дэпутатка, якая рыхтуе прыгажунь для Лукашэнкі, выйшла замуж23
Каментары