Турбізнэс наракае, што з-за дзяржаўных абмежаванняў яму не хапае экскурсаводаў
12 снежня ў Мірскім замку прайшоў выязны круглы стол, на якім чыноўнікі з Міністэрства культуры і іншых устаноў абмяркоўвалі праблемы турыстычнай галіны з прадстаўнікамі музеяў і турбізнэсу. Падчас яго прагучалі скаргі на тое, што патрабаванні абноўленага Кодэкса аб культуры тармозяць развіццё галіны, паколькі ў буйных музеях узнікае праблема з экскурсаводамі. Пра гэта паведамляецца на сайце Рэспубліканскага саюза турыстычных арганізацый.
Рэч у тым, што ў Кодэксе аб культуры змяшчаецца палажэнне, што «экскурсійнае абслугоўванне наведвальнікаў музеяў ажыццяўляецца толькі работнікамі гэтых музеяў. Экскурсійнае абслугоўванне наведвальнікаў музея іншымі асобамі забаронена».
То-бок экскурсаводы, якія атэставаныя Нацыянальным агенцтвам па турызме, але пры гэтым не з'яўляюцца штатнымі супрацоўнікамі музеяў, не могуць праводзіць там экскурсій.
Гэтым летам турфірмы па-сапраўднаму сутыкнуліся з гэтай праблемай у буйных, запатрабаваных у турыстаў музейных комплексах: Хатыні, Нясвіжскім замку, Брэсцкай крэпасці і іншых. Штатных супрацоўнікаў музеяў проста не хапала для абслугоўвання ўсіх сфармаваных імі груп.
Падчас сустрэчы прадстаўнікі Міністэрства культуры абяцалі знайсці варыянты і дапамагчы турбізнэсу вырашыць праблемы да будучага актыўнага сезона.
Так, яны паведамілі, што для таго, каб зняць праблему частковага недахопу экскурсаводаў, яны хочуць павялічыць гадзіны працы музейных супрацоўнікаў у святочныя і выхадныя дні.
На думку прадстаўнікоў турфірм, атэставаныя Нацыянальным агенцтвам экскурсаводы, многія з якіх праводзяць экскурсіі па самых значных аб'ектах турыстычнай музейнай інфраструктуры больш за 30 гадоў, робяць гэта прафесійна, і можна было б дапусціць іх (пасля праслухоўвання) да правядзення экскурсій на самых запатрабаваных аб'ектах.
Праўда, прадстаўнікі Міністэрства культуры падкрэслівалі, што пра змену палажэнняў новага Кодэкса аб культуры гаворка ісці не будзе.
У апошнія гады ў Беларусі зрабілі больш жорсткімі патрабаванні да экскурсаводаў, асноўная мэта зменаў — уключыць экскурсаводаў у сістэму дзяржаўнай прапаганды і ўсталяваць над імі жорсткі ідэалагічны кантроль. Напрыклад, гэтым летам Міністэрства спорту і турызму распрацавала для іх спіс прафесійных і этычных патрабаванняў.
У Карэлічах арыштавалі экскурсавода Юрыя Красоўскага. Для яго гэта ўжо чацвёрты раз
«Недапушчэнне пры правядзенні экскурсій суб'ектыўных некарэктных ацэнак». Мінспорту вызначыла патрабаванні да экскурсаводаў і гідаў-перакладчыкаў
Сула, Дудуткі, Дукора — колькі каштуе адпачынак у беларускіх парках культуры і гісторыі
«Пенсіянерам дзеці перашкаджаюць!» У Брэсце не першы месяц ідуць спрэчкі наконт месца для будаўніцтва дзіцячага сада5
Каментары