Качанава заявіла, што падстаў для незадавальнення ў Беларусі няма
Старшыня Савета Рэспублікі правяла сёння нараду з кіраўніцтвам і, канечне, не ўтрымалася, каб лішні раз не працытаваць Лукашэнку як мудрага правадыра.
«Вы ведаеце, што гэты год — Год якасці, таму на нарадзе, якая прайшла літаральна на мінулым тыдні, Аляксандр Рыгоравіч казаў (і я хачу трансляваць гэта вам): «Усё, што робіцца ў нашай краіне, усе мерапрыемствы, якія праводзяцца, — усё павінна быць эфектыўна і вынікова. Проста так, для птушачкі, нічога рабіць не трэба. Гэта няправільныя падыходы», — сказала яна (цытата паводле тэлеграм-канала Савета Рэспублікі).
Не абышлося без згадкі пра будучыя выбары.
«Электаральная кампанія — гэта калі ўсё крыху абвострана. Па-першае, людзі часцей звяртаюцца з прапановамі. Па-другое, тыя, хто настроены супраць Беларусі на знешнім контуры, будуць спрабаваць дыскрэдытаваць уладу … Але гэта ў іх не атрымаецца, бо ў нас няма падстаў у краіне, каб нехта быў чымсьці незадаволены», — упэўнены чацверты чалавек у краіне.
«Уся справа ў нас. Калі гэта добры доктар — то не будзе пытанняў. Калі добры будаўнік, якасць і тэрміны будаўніцтва — не будзе пытанняў. Калі добры прадавец — у яго купяць прадукцыю», — накідала прыкладаў Наталля Качанава.
Яна таксама звярнула ўвагу, што беларусы забяспечаныя прадуктамі.
«Сёння мы гаворым аб якасці, аб тым, як зрабіць лепш, што ўдасканаліць, як жыццё нашых людзей зрабіць больш камфортным. Многія ў свеце ўсяго гэтага пазбаўлены зусім», — акрэсліла паралелі на карысць Беларусі экс-кіраўнік Адміністрацыі прэзідэнта.
Каментары