Першы магазін парфумерыі расійскай сеткі «Лэтуаль» павінен адкрыцца ў гандлёвым цэнтры Minsk City Mall. Чуткі пра гэта з'явіліся яшчэ ў снежні, цяпер жа іх пацвердзіў «Анлайнер» са спасылкай на свае крыніцы.
Дакладная дата адкрыцця крамы пакуль не называецца, на гарачай лініі «Лэтуаль» у Расіі і ў адміністрацыі Minsk City Mall сведчанні крыніцы «Анлайнера» і не пацвердзілі і не абвергнулі.
Яшчэ ў сакавіку 2023 года «Коммерсант» пісаў, што «Лэтуаль» разглядае магчымасць выхаду ў некалькі краін, у тым ліку ў Беларусь. Эксперты выдання звязвалі пашырэнне сеткі не толькі з нарошчваннем выручкі, але і з імкненнем сфарміраваць лагістычныя маршруты, якія дазволілі б увозіць у Расію прадукцыю замежных вытворцаў.
Галоўныя канкурэнты кампаніі ў Беларусі — «Залаты яблык» (працуе ў Беларусі з 2021 года) і «Кравт» (першая крама — 2003 год), беларуская сетка парфумерна-касметычных крам.
«Лэтуаль» — найбуйнейшая ў Расіі парфумерная рознічная сетка, заснаваная ў 1997 годзе. Цяпер пад кіраваннем кампаніі знаходзіцца каля 1 тыс. крам у 250 гарадах.
Цяпер чытаюць
Дэпутат Клішэвіч стаў кандыдатам гістарычных навук з дысертацыяй пра разлажэнне беларускага камсамола ў часы «перабудовы»2
Каментары