Каардынацыйная рада паведаміла, што на яе агульным пасяджэнні зацвердзілі склад выбарчай камісіі. У структуру, якая будзе займацца арганізацыяй выбараў у Каардынацыйную раду, уключылі 5 чалавек, якія не могуць быць кандыдатамі на наступных выбарах. Сярод іх тры юрысты, журналістка і тэолаг.
Персанальны склад камісіі наступны:
Андрэй Атаманчук — юрыст, правазнавец, былы адвакат Мінскай абласной калегіі адвакатаў. У канцы сакавіка 2022 года падвергся пераследу з боку беларускіх уладаў: адседзеў 30 сутак, а затым быў пазбаўлены права на прафесію. Цяпер жыве ў Літве.
Альвіна Мінгазава — юрыстка, былы член Мінскай гарадской калегіі адвакатаў. У сувязі з тым, што з 2020 года большасць спраў, якія вяла адвакатка, былі палітычнага характару, у 2022 годзе была вымушана пакінуць Беларусь. Цяпер працуе юрысткай у ініцыятыве Free Belarus Center, якая дапамагае беларусам ва Украіне і Польшчы.
Яраслаў Бекіш — тэолаг-рэлігіязнаўца, магістр паліталогіі ЕГУ, экс-каардынатар сеткі экалагічных грамадскіх арганізацый «Зялёная сетка», былы член кіраўнічага камітэта Форума грамадзянскай супольнасці Усходняга партнёрства, былы член праўлення міжнароднага кансорцыўма «ЕўраБеларусь». 3 2001 года быў валанцёрам і назіральнікам ад міжнародных грамадскіх арганізацый на выбарах у Беларусі, Малдове і Украіне. Дэлегат Каардынацыйнай рады 2-га склікання.
Алена Прыходзька — журналістка, медыя-менеджарка, грамадская актывістка. Алена з'яўляецца дэлегаткай КР другога склікання, уваходзіць у склад фракцыі «Шчаслівая нацыя». У 2021 годзе выехала ва Украіну, з пачаткам расійскага ўварвання пераехала ў Еўропу.
Зміцер Лазавік — юрыст, былы адвакат. Быў назіральнікам на выбарах прэзідэнта ў 2020 годзе, дэлегатам на платформе «Сход». У 2021-м па месцы рэгістрацыі адваката адбыўся ператрус у межах крымінальнай справы, у якой Зміцер з'яўляўся абаронцам. З 2021 года пастаянна жыве ў Польшчы, працуе намеснікам дырэктара па развіцці ў камерцыйнай арганізацыі.
Прозвішча Лазавік, дарэчы, у памяці беларусаў трывала асацыюецца з выбарчымі справамі, бо ў 2000-2016 гадах Мікалай Лазавік быў правай рукой сумна вядомай Лідзіі Ярмошынай. Аднак жа ў гэтым выпадку ўсе супадзенні выпадковыя.
Каментары
гендарныяжаночыя квоты на 40% як хацела пару фаміністкак і неамарксістаў (усе расейскамоўныя) ці не?