Экс-міністр абароны Украіны Рэзнікаў праз сем месяцаў знайшоў новую працу
Аляксей Рэзнікаў стаў дырэктарам праграм бяспекі і абароны ў Інстытуце будучыні.
Сузаснавальнік Украінскага інстытута будучыні Ігар Ліскі ў фэйсбуку апублікаваў сумесную фатаграфію з Рэзнікавым. На фота таксама прысутнічае яшчэ адзін сузаснавальнік праграм бяспекі і абароны — Анатоль Амелін, піша «Украінская праўда».
«Цяпер гэта самы актуальны кірунак, і мы вельмі верым, што менавіта Аляксей Рэзнікаў зможа даць свежы штуршок у сферы абароны і бяспекі нашай краіны. Чакаем вашых ідэй, думак і супрацоўніцтва. Абяцаем новы ўзровень аналітыкі, зместу і дыскусіі», напісаў Ліскі.
5 верасня 2023 года Вярхоўная Рада звольніла Аляксея Рэзнікава з пасады міністра абароны, а 6 верасня прызначыла замест яго былога кіраўніка Фонду дзяржмаёмасці Рустэма Умерава.
У студзені стала вядома, што Рэзнікаў аднавіў сваё права займацца адвакацкай дзейнасцю.
Каментары