Пашынян заявіў пра намер падаць заяўку ў Еўрасаюз у 2027 ці 2028 годзе
Прэм’ер-міністр Арменіі Нікол Пашынян заявіў, што ягоная краіна можа падаць афіцыйную заяўку на ўступленне ў Еўрапейскі саюз у 2027 або 2028 годзе. Паводле яго слоў, такі тэрмін з’яўляецца рэалістычным. Пра гэта ён сказаў на саміце Euronews, прысвечаным пашырэнню ЕС.
Пашынян адзначыў, што ўрад ужо пачаў працэс, які павінен прывесці да прыняцця канчатковага рашэння аб падачы заяўкі. У жніўні ён заяўляў у парламенце, што Арменія мае намер звярнуцца з такой просьбай у найбліжэйшай будучыні. Пакуль афіцыйная заяўка не пададзеная. Ерэван таксама вядзе з Еўракамісіяй перамовы аб лібералізацыі візавага рэжыму і разлічвае завяршыць гэты працэс да 2029 года.
Пашынян назваў еўрапейскую інтэграцыю стратэгічным выбарам, звязаным з абаронай дэмакратыі ў краіне. Ён нагадаў, што пасля рэвалюцыі 2018 года да ўлады прыйшлі новыя палітычныя сілы, а Еўрасаюз стаў адным з асноўных партнёраў Арменіі ў правядзенні дэмакратычных рэформаў.
Па словах прэм’ера Арменіі, адна з галоўных задач урада — даць армянскаму грамадству магчымасць выбару. Ён адзначыў, што раней у краіне і суседніх дзяржавах часта лічылі, нібыта ў Арменіі няма альтэрнатывы традыцыйнаму супрацоўніцтву з Расіяй.
На фоне збліжэння Ерэванa з Бруселем Масква патрабуе ад Арменіі вызначыцца паміж Еўрасаюзам і Еўразійскім эканамічным саюзам. Расія таксама пагражала магчымымі мерамі ў адказ, у тым ліку спыненнем паставак энерганосьбітаў. У адказ Пашынян заявіў, што ягоны ўрад імкнецца дыверсіфікаваць палітычныя і эканамічныя сувязі краіны. Ён падкрэсліў, што адсутнасць балансу ў міжнародных дачыненнях заўсёды стварае рызыкі.
Каментуючы пагрозы былога прэзідэнта Расіі Дзмітрыя Мядзведзева, які параўноўваў магчымы шлях Арменіі з сітуацыяй ва Украіне, Пашынян адхіліў такое параўнанне. Ён заявіў, што галоўная мэта краіны — умацаванне незалежнасці і развіццё міжнароднай інтэграцыі.
Прэм’ер таксама адзначыў, што канчатковы выбар паміж уступленнем у ЕС і захаваннем членства ў Еўразійскім эканамічным саюзе павінен зрабіць народ Арменіі.
Пашынян дадаў, што прыкладам для армянскага грамадства стала імкненне Грузіі ўступіць у Еўрасаюз. Паводле яго слоў, поспех Грузіі ў гэтым кірунку мае значэнне для таго, як грамадзяне Арменіі ацэньваюць уласныя еўрапейскія перспектывы.
Пашынян заявіў, што Арменія не будзе праводзіць рэферэндум аб сяброўстве ў ЕС
Еўрасаюз плануе адмяніць мыты на большасць прадукцыі з Арменіі
ЕС абяцаў Арменіі 50 мільёнаў еўра эканамічнай дапамогі ў гандлёвай вайне з Расіяй
«Крызіс ва Украіне з гэтага пачаўся». Пуцін у Астане намякаў на будучыя праблемы ў Арменіі
«Арменія — гэта ўжо не абрабаваная вамі і вашымі партнёрамі краіна». Пашынян рашуча адказаў Лукашэнку
Цяпер чытаюць
Арыштавалі прадстаўнікоў кампаніі Bayer у Беларусі6
Каментары