У ЗША пачынаецца вырашальны дзень прамежкавых выбараў у Кангрэс. Больш за 50 мільёнаў выбаршчыкаў ужо прагаласавалі
Амерыканцы выбіраюць увесь склад Палаты прадстаўнікоў (435 кангрэсменаў), а таксама 35 са 100 сенатараў. Акрамя таго, выбаршчыкі галасуюць за прадстаўнікоў мясцовых уладаў.
У многіх штатах праходзяць выбары губернатараў, генеральных пракурораў, заканадаўчых органаў штатаў і мясцовых службовых асоб, паведамляе Радыё Свабода.
Першыя пункты для галасавання на ўсходнім узбярэжжы ЗША адкрыюцца 13:00 паводле Мінска (5:00 паводле мясцовага часу) ў паўночным штаце Вермонт. Яшчэ праз гадзіну выбаршчыкі прыйдуць на ўчасткі ў Нью-Джэрсі, Вірджыніі, Канектыкуце і Кентукі.
Першыя ўчасткі пачнуць закрывацца ў 18:00 паводле мясцовага часу (02:00 4 лістапада па Мінску) у штатах Індыяна і Кентукі.
Усяго ў ЗША зарэгістравана больш за 210 мільёнаў выбаршчыкаў. Больш за 50 мільёнаў з іх ужо прагаласавалі датэрмінова. Такая магчымасць прадугледжана ў 47 штатах і акрузе Калумбія. Яны могуць аддаць свой голас на спецыяльных выбарчых участках або па пошце.
Амерыканскія вайскоўцы і грамадзяне, якія знаходзяцца за межамі краіны, таксама дасылалі свае бюлетэні загадзя. Напрыклад, такім чынам прагаласаваў Папа Рымскі Леў XIV, які з'яўляецца грамадзянінам ЗША і мае імя Роберт Фрэнсіс Прэвост. Ён зарэгістраваны як выбаршчык у мястэчку Нью-Ленакс (штат Ілінойс, непадалёк ад Чыкага), дзе нарадзіўся і вырас.
Цяпер Рэспубліканская партыя мае большасць у абедзвюх палатах Кангрэса: 53 месцы са 100 у Сенаце і 218 месцаў з 435 у Палаце прадстаўнікоў.
Апублікаваныя напярэдадні галасавання вынікі апытанняў сведчаць, што дэмакраты амаль напэўна могуць атрымаць большасць у Палаце прадстаўнікоў і з высокай верагоднасцю — у Сенаце.
У нядзелю, 1 лістапада, прэзідэнт ЗША Дональд Трамп, які прадстаўляе Рэспубліканскую партыю, заявіў, што ў выпадку перамогі дэмакратаў стане «містэрам Вета». Ён таксама сказаў, што пастаянныя вета змогуць прымусіць кангрэсменаў ад Дэмакратычнай партыі «заключыць пагадненне» з прэзідэнтам.
Палата прадстаўнікоў адыгрывае важную ролю ў зацвярджэнні бюджэту і ініцыяванні імпічменту, а Сенат зацвярджае кандыдатуры на ключавыя дзяржаўныя пасады, у тым ліку суддзяў, і ратыфікуе міжнародныя дамовы.
Першыя вынікі чакаюцца пасля закрыцця выбарчых участкаў увечары 3 лістапада. Канчатковае размеркаванне месцаў у Кангрэсе можа стаць вядомым не адразу, паколькі ў штатах дзейнічаюць розныя правілы падліку бюлетэняў.
Паводле звестак урада ЗША, на прамежкавых выбарах 2022 года прагаласавалі каля 46% выбаршчыкаў.
Цяпер чытаюць
Віцебскі вядучы пажартаваў на закрытым мерапрыемстве. Праз дзве гадзіны да яго прыехала міліцыя праз данос24
Віцебскі вядучы пажартаваў на закрытым мерапрыемстве. Праз дзве гадзіны да яго прыехала міліцыя праз данос
«Доктарка», адвакат, чалавек з камерай і некалькі дужых хлопцаў. У Петрапаўлаўскай Баршчагоўцы расійскія спецслужбы скарысталіся спецыфічным украінскім бізнэсам ваеннага часу1313
Каментары