29 кілаграм у тры гады: мінчанка гадуе дачку з цяжкай хваробай, а хейтары прапануюць перастаць даваць ежу вёдрамі
Дачцэ Юліяны Таратуты хутка споўніцца ўсяго 3 гады, але важыць дзяўчынка ўжо 29 кілаграм. Шмат хейтараў пішуць маці, якая даволі актыўная ў сацыяльных сетках, што не трэба даваць дзіцяці ежу вёдрамі. Але справа не ў харчаванні, а ў цяжкай хваробе. Пра гэта жанчына цярпліва распавядае ў блогу.
Незвычайную дзяўчынку бацькі ласкава называюць Малая Па. Яе вельмі чакалі — цяжарнасць у маці працякала ідэальна.
У інтэрв’ю парталу 24health.by Юліяна распавядала, што ў радзільню 5-й бальніцы Мінска яна прыехала ў акушэрскі тэрмін 42 тыдні і 3 дні, бо роды не пачыналіся самастойна. Там нават дактары здзівіліся: нягледзячы на вялікі тэрмін цяжарнасці, згодна з УГД тэрмін складаў усяго 35 тыдняў. Калі на наступны дзень даследаванне паўтарылі, то змянілі тэрмін на 37 тыдняў і 3 дні — усё роўна нашмат меншы за акушэрскі.
Дактары вырашылі стымуляваць роды. Нарадзілася Паліна не вельмі вялікай (менш за 3 кілаграмы) і слабенькай — у дзіцяці нават не было сілаў закрычаць і пачаць смактаць малодзіва.
Першыя месяцы жыцця дзяўчынка вельмі дрэнна набірала вагу. Потым пачала набіраць больш-менш норму, алё ўсё роўна выглядала слабенькай. Калі Малой Па было 4 месяцы, педыятр параіў здаць аналізы на гармоны, бо яе скура выглядала ацёклай. Але вынікі нікога не напужалі — усё было па ніжняй мяжы нормы.
— Потым нам пачалі казаць: «Вам ужо 6 месяцаў, пачынайце даваць брокалі, дзіцячае печыва для набору вагі (яно ж каларыйнае), дзіцячае пюрэ, можаце спрабаваць сокі», — распавядала пазней у сторыс Юліяна. — І калі я пабачыла, што маё дзіцё іх есць і набірае вагу, для мяне гэта стала перамогай. Таму што ўвесь час казалі: «Дзіця недабірае», — а тут нарэшце ўсё стала добра. З шостага па сёмы месяц яна набрала кілаграм.
На аглядзе ў год педыятр зноў параіў здаць аналіз на гармоны. Раптам высветлілася, што ў дзяўчынкі праблемы са шчытападобнай залозай — яна не выпрацоўвае дастатковай колькасці гармонаў. У выніку доўгіх абследаванняў у розных установах аховы здароўя Паліне паставілі дыягназ гіпатэрыёз.
Канешне, цяжкая хвароба ўплывае на тое, як развіваецца дзіця. У Паліны ўскладненая форма марбіднага атлусцення і затрымка псіхаматорнага і маўленчага развіцця з мышачнай гіпатаніяй. Нядаўна сям'я аформіла ёй інваліднасць, хоць маральна на гэта было складана рашыцца.
Свае першыя крокі Малая Па зрабіла толькі ў 2 гады і 9 месяцаў. Відэа з гэтай грандыёзнай для бацькоў падзеяй набрала ў тыктоку 5,4 мільёна праглядаў, больш за 122 тысячы лайкаў і каля 13 тысяч каментарыяў. На жаль, не ўсе каментатары паспрабавалі разабрацца ў сітуацыі — многія сталі пісаць абразлівыя паведамленні, а нехта нават папракаў маму ў тым, што дзяўчынку раскармілі дзеля хайпу.
Юліяна была вымушана запісаць ролік, у якім паказала «вядро ежы», якое, па сцвярджэнні хейтараў, яна дае Паліне. Маці ўзважыла на кухонных вагах сняданак — талерку аўсянкі з ягадамі. Атрымалася, што вага ежы з талеркай 498 грам, з якіх 394 важыць сама талерка. Вага ж самай порцыі — 104 грама.
Гэтае відэа набрала ў тыктоку 9,5 мільёна праглядаў, 219 тысяч лайкаў і 12 тысяч каментарыяў. Сумна, але і ў гэты раз хейтараў у каментарыях знайшлося нямала. Але Юліяна не плануе кідаць блогерства і верыць, што калі-небудзь людзі пачнуць думаць і разважаць інакш.
Дык усё ж ці бяспечны Telegram і для якіх мэтаў бяспечны? Вось што ясна на сёння11
Дык усё ж ці бяспечны Telegram і для якіх мэтаў бяспечны? Вось што ясна на сёння
«Вайна ўсё спіша». Беларускім удзельнікам гей-прайда ў Вільні пагражалі расправай ад імя беларускіх ваяроў за выкарыстанне бела-чырвона-белага сцяга219219
Каментары