Транспартнікі пачалі змагацца з перасадкамі ў першыя аўтобусы на беларуска-польскай мяжы
Адпрацаваная раней схема, калі падарожнікі перасаджваліся з апошніх аўтобусаў у першыя, пачынае даваць збой. Усё праз умяшальніцтва з боку транспартнай інспекцыі.
Пяць-сем гадзін замест сутак у чарзе
Чэргі з аўтобусаў на адзіным дзейным пасажырскім пераходзе «Брэст» у апошнія месяцы сталі пастаяннымі. У пікавыя дні выезду з Беларусі чакаюць па 50-80 аўтобусаў.
Праезд мяжы займае суткі і болей. Каб скараціць час чакання, беларусы прыдумалі лайфхак — перасаджвацца на вольныя месцы ў аўтобусы, якія стаяць блізу шлагбаума. У залежнасці ад загружанасці кіроўцы бралі з пасажыра ад 40 да 150 рублёў.
Такія рухі дазвалялі сэканоміць нават суткі чакання. Такім чынам можна прайсці абедзве мяжы за 5-7 гадзін замест 24-42 гадзін.
Транспартная інспекцыя супраць
Свае карэкціроўкі ў працу схемы з перасадкамі намагаюцца ўнесці супрацоўнікі транспартнай інспекцыі, якія ўчора прыязджалі з рэйдам на граніцу.
З іх з'яўленнем кіроўцы аўтобусаў пачалі адпраўляць на вакзал усіх ахвотных падсесці ў аўтобус — маўляў, квіткі можна набыць толькі там. Таму прынамсі нейкі час схема не працавала.
У чатах пішуць, што пасля гэтага падсесці ў першыя аўтобусы стала складаней, бо кіроўцы баяцца браць пасажыраў.
Пры гэтым нельга казаць, што падсесці немагчыма зусім. Падарожнікі, якія сёння ноччу ехалі праз мяжу, пацвярджаюць, што да іх падсаджваліся пасажыры з апошніх аўтобусаў.
Таксама людзі адзначаюць, што беларускі бок намагаецца як мага хутчэй запусціць аўтобусы за шлагбаум. Тады памежнікі запісваюць сабе колькасць чалавек у салоне, і падсесці становіцца немагчыма.
Іншым шляхам, як хутчэй дабрацца з Беларусі ў Польшчу, застаецца паездка праз Літву. Прынамсі да ўвядзення абмежаванняў на правоз прадуктаў беларускай вытворчасці паездкі з Мінска або Гродна ў Варшаву праз Вільню карысталіся папулярнасцю. Дабрацца такім чынам да польскай сталіцы зможна было за 15-17 гадзін з улікам дарогі, праходжання мяжы і чакання аўтобуса Вільня-Варшава.
Цяпер чытаюць
«Ведаеце, як каментуе ваша затрыманне апазіцыя? «Арыштаваны памагаты рэжыму». Турэмная споведзь лідара прафсаюзаў Ярашука1
Каментары