Беларус сабраў грыбы ў Чарнобыльскай зоне і аднёс у лабараторыю. Якія вынікі?
Беларускі грыбнік і блогер Аляксандр Гарбацэвіч вырашыў праверыць, наколькі забруджаныя радыенуклідамі грыбы ў Чарнобыльскай зоне. Для гэтага ён адправіўся ў Нараўлянскі раён, прыкладна за 60 кіламетраў ад Чарнобыльскай АЭС, а вынікамі эксперыменту падзяліўся ў тыктоку, піша Tochka.by.
Гарбацэвіч адзначыў, што грыбы ў гэтай мясцовасці амаль не збіраюць. За час «ціхага палявання» ён убачыў толькі некалькі зрэзаных грыбоў. Для праверкі ён сабраў чатыры віды: сасновыя баравікі, польскія грыбы, маслякі і зялёнкі. На выгляд усе яны былі прыгожымі, моцнымі і без прыкметных пашкоджанняў.
Разглядаючы адзін з баравікоў, грыбнік выказаў здагадку, што за вонкавай прыгажосцю можа хавацца значнае радыеактыўнае забруджванне.
Ужо ў Мінску сабраныя грыбы адправілі ў лабараторыю ветэрынарна-санітарнай экспертызы на Камароўскім рынку.
Самымі «чыстымі» з чатырох відаў аказаліся баравікі, але і ў іх узровень радыеактыўнага забруджвання склаў 1295 Бк/кг пры дапушчальным паказчыку 370 Бк/кг. Такім чынам, норма была перавышаная прыкладна ў 3,5 раза.
У польскіх грыбах знайшлі 14 628 Бк/кг, а ў масляках — 15 253 Бк/кг. Гэта адпаведна прыкладна ў 40 і 41 раз больш за дапушчальны ўзровень.
Найбольш забруджанымі аказаліся зялёнкі. У іх зафіксавалі 30 438 Бк/кг, што больш чым у 82 разы перавышае дапушчальную норму.
Аўтар відэа таксама распытаў спецыялістаў, ці можна зрабіць такія грыбы бяспечнейшымі з дапамогай вымочвання і варэння. Паводле іх тлумачэння, норма ў 370 Бк/кг устаноўленая для свежых грыбоў, а пасля вымочвання і варэння частка радыенуклідаў сапраўды можа выдаляцца. Аднак з улікам атрыманых вынікаў спецыялісты не раяць рызыкаваць і рэкамендуюць такія грыбы не ўжываць у ежу.
Каментары