Рыжанкоў расказаў, пры якой умове Лукашэнка згодны сустрэцца з Трампам
Беларусь разглядае магчымасць сустрэчы Аляксандра Лукашэнкі з прэзідэнтам ЗША Дональдам Трампам у практычнай плоскасці. Пра гэта заявіў міністр замежных спраў Беларусі Максім Рыжанкоў у інтэрв’ю расійскаму агенцтву РИА «Новости».
Паводле слоў Максіма Рыжанкова, кантакты паміж Мінскам і Вашынгтонам ужо адбываюцца. Праз пасланнікаў Трампа Лукашэнку перадаваліся спецыяльныя пасланні, на іх паступалі адказы, таксама палітыкі правялі некалькі тэлефонных размоў.
Рыжанкоў адзначыў, што для асабістай сустрэчы неабходна загадзя падрыхтаваць змястоўны парадак дня і канкрэтныя дамоўленасці, якія бакі маглі б пасля рэалізоўваць. Паводле яго, сустрэча не павінна адбывацца толькі дзеля самой размовы — яна павінна «саспець».
Пры гэтым Беларусь, як заявіў міністр, адкрытая да такой сустрэчы і прыкладае значныя намаганні, каб яна адбылася. Аднак Мінск не гатовы ісці на яе любой цаной і не мае намеру займаць пазіцыю таго, хто просіць.
Рыжанкоў не выключыў, што сустрэча Лукашэнкі і Трампа можа адбыцца ў бліжэйшай перспектыве, але не назваў ні магчымых тэрмінаў, ні месца яе правядзення.
Ён таксама нагадаў, што раней Трамп запрашаў Лукашэнку ўзяць удзел у пасяджэнні Рады міру ў ЗША. Аднак, паводле Рыжанкова, паездцы перашкодзілі тэхнічныя праблемы, у тым ліку звязаныя з санкцыйнымі абмежаваннямі і магчымасцямі пералёту.
Беларусь таксама зацікаўленая ў развіцці гандлёва-эканамічных і фінансавых сувязяў са Злучанымі Штатамі. Сярод пытанняў, якія цікавяць амерыканскі бок, Рыжанкоў назваў нелегальную міграцыю, трансгранічную злачыннасць, незаконны абарот зброі і наркотыкаў, а таксама гандаль людзьмі.
Пры гэтым кіраўнік МЗС падкрэсліў, што Мінск не збіраецца развіваць адносіны з Вашынгтонам за кошт сваіх сувязяў з Расіяй і Кітаем.
Закрануў Рыжанкоў і праблему беларускіх палітзняволеных. Ён заявіў, што інтарэс амерыканскага боку да вызвалення асоб, затрыманых па палітычных прычынах у Беларусі, звязаны з тым, што яны раней атрымлівалі падтрымку на Захадзе, разлічваючы ў выпадку неабходнасці на яго дапамогу і гарантыі. Таму цяпер, маўляў, заходнім краінам і трэба вырашаць гэтае пытанне, каб захаваць свой твар.
Рыжанкоў сказаў, што калі амерыканскі і еўрапейскі бакі гатовыя займацца вызваленымі людзьмі за мяжой, Беларусь не мае супраць гэтага пярэчання. Ён таксама заявіў, што зняволеныя былі адным з раздражняльнікаў у адносінах Беларусі з Захадам, але цяпер гэтая праблема нібыта паступова губляе вастрыню. Частка людзей, маўляў, выходзіць на волю пасля адбыцця прызначаных тэрмінаў, і гэта нібыта дазваляе заходнім палітыкам лягчэй захоўваць свой імідж і адначасова развіваць кантакты з Беларуссю.
Цяпер чытаюць
Ціханоўскі: Ціханоўскай можна было ў 2020‑м не пабаяцца турмы. І, можа, у беларусаў быў бы шанец137
Каментары