Сям'я Пратасевічаў праспявала «Вецер перамен». Як сёлета святкавалі выпускныя
Радасныя выпускнікі запоўнілі сацыяльныя сеткі фота і відэа са свайго свята. «Наша Ніва» паглядзела, як жа адзначалі выпускныя пасля папрокаў Лукашэнкі. Спройлер: аўтобусы замест лімузінаў, чырвона-зялёныя фаеры і ўскладанне кветак партызанам.
У Магілёве, здаецца, сур’ёзна падышлі да патрабавання Лукашэнкі наконт «ніякіх лімузінаў». Выпускнікоў на «Зорны выпускны» прывозілі МАЗаўскія аўтобусы, якія ўпрыгожылі шарамі і налепкамі.
Але нехта з магілёўскіх выпускнікоў пажартаваў з гэтых святочных аўтобусаў і зрабіў відэа пад песню «Атэстат» групы «Бутырка». «Сустракаючы світанак, выпускнікі нават не падазравалі, што правядуць разам яшчэ 15 сутак», — падпісаў ролік аўтар.
Watch on TikTok
У сталічнай гімназіі №15 выпускнікам, якія чакалі світанак, прапанавалі напісаць пажаданне сабе праз 10 гадоў. Усе запіскі сабралі і заклалі «капсулу часу».
А адміністрацыя школы пахвалілася тым, як стылёва выглядае школьнае кафэ, дзе і святкавалі выпускны.
У гомельскай школе №60 выпускны арганізоўвалі самастойна. Ніякага пафасу: на школьнай сцэне ўчорашнія адзінаццацікласнікі і іх бацькі паказвалі гумарыстычныя сцэнкі, а потым танчылі. Здаецца, усім было весела.
У адной з іншых школ Гомеля таксама святкавалі выпускны ў сценах навучальнай установы. Пасля афіцыйнай часткі з уручэннем атэстатаў танчылі і спявалі ў фае на фоне стэндаў пра здаровае харчаванне, а сустракаючы світанак, палілі чырвоныя і зялёныя фаеры.
Watch on TikTok
У Валожыне на выпускным сям’я Пратасевічаў выканала песню «Вецер перамен».
На свята ў гонар заканчэння 11 класаў у Беразіно запрасілі і адзіную выпускніцу Ушанскай сярэдняй школы. Дзяўчынку, якая, здаецца, крыху саромелася быць у цэнтры ўвагі, суправаджалі дырэктар школы і класная кіраўніца.
Watch on TikTok
У Маладзечне выпускнікі школ разам з настаўнікамі і бацькамі арганізавалі святочнае шэсце і прайшлі па перакрытай праезнай частцы.
У Шчучыне перад пачаткам святкавання выпускнікоў розных школ і гімназій горада павезлі ўскладаць кветкі да помніка савецкім воінам і партызанам, загінуўшым у гады вайны.
Сёлета школу скончыла юная артыстка Дзіяна Маляўская. Дзяўчына ўдзельнічала ў 3 сезоне шоу «Фактар.by» і цяпер вельмі ганарыцца тым фактам, што яе выступ трапіў у сторыс Вольгі Бузавай. У гэтым годзе Дзіяна прэзентавала песню «Выпускны». Хлопец спявачкі падарыў вялікі букет кветак ёй на сцэне падчас уручэння атэстатаў.
Дарэчы, трэба адзначыць, што такая праява пачуццяў цяпер у трэндзе. У тыктоку ёсць дзясяткі відэа ад беларускіх выпускніц, якія атрымліваюць ад любімых букеты. Подпіс звычайна такі: «Здзейсніў мару».
Watch on TikTok
У Жодзіне гераіняй выпускнога бала стала Яўгенія Свойнікава, якая скончыла школу №2. Да яе на свята раптоўна прыехаў яе каханы Мікіта Іваноў, які цяпер служыць у арміі — хлопец у армейскай форме прыехаў з букетам руж. Дарэчы, пара стала і зоркамі тыктоку — відэа пра іх набрала ўжо 420 тысяч праглядаў.
Watch on TikTok
Здаецца, здымка відэа для тыктокаў ужо таксама сталі важнай часткай святкавання выпускных і падрыхтоўкі да іх. Напрыклад, ролікі гэтай блогеркі-выпускніцы з Маладзечна збіраюць сотні тысяч праглядаў.
Дванаццаць навучэнцаў не здалі першы ЦЭ, бо іх прызвалі ў армію
«Сказалі, што атэстат пасля школы не дадуць». Што будзе з выпускнікамі, якія атрымалі нуль за ЦЭ?
Ці шмат грошай сёлета згубілі падрадчыкі, якія займаюцца арганізацыяй выпускных? Аказваецца, не ўсё так кепска
Без лімузінаў і дыджэяў, але з Годам якасці. Пасля заўвагі Лукашэнкі ў Мінску забаранілі «залішнюю раскошу» на выпускных
Каментары