У Мінску маладога лейтэнанта судзяць за «распусныя дзеянні» ў адносінах да падлетка
Расказваем, што такое «распусныя дзеянні» і якая адказнасць прадугледжаная за іх.
Хлопца, якога судзяць, зваць Ягор Брычкоўскі. Яму 23 гады, родам ён з Баранавічаў. Вядома, што раней ён займаўся самба і нават быў у нацыянальнай зборнай Беларусі.
Пасля сканчэння ўніверсітэта пайшоў працаваць участковым інспектарам па справах непаўналетніх, меў званне лейтэнанта. Месца працы — апорны пункт міліцыі № 310 у Мінску на Паўднёвым Захадзе. Але кар'ера не задалася.
Мужчыну пачынаюць судзіць 28 чэрвеня ў закрытым рэжыме. Артыкулы неадназначныя — «распусныя дзеянні ў адносінах да асобы, якая не дасягнула 16 гадоў, здзейсненыя з ужываннем гвалту, або ў дачыненні да малалетняга, або асобай, на якую ўскладзеныя абавязкі па гадаванні непаўналетняга» (ч. 2 арт. 169 КК) і «перавышэнне ўлады або службовых паўнамоцтваў, здзейсненыя з асабістай зацікаўленасці» (ч. 2 арт. 426 КК).
Што ж такое «распусныя дзеянні»? Згодна з каментаром Вярхоўнага суда, гэта «негвалтоўнае ўздзеянне на асобу, якая не дасягнула шаснаццацігоддзя, накіраванае на ўзбуджэнне ў яго цікавасці да сэксу, палавой цягі».
На практыцы гэта можа быць усё што заўгодна, акрамя сэксу. Напрыклад, мастурбацыя пры непаўналетнім або дакрананне да яго інтымных месцаў без палавога кантакта, або занадта агрэсіўнае заляцанне з прапановамі сэксу ў месенджарах ці сацсетках.
Паводзіны падлетка пры гэтым не ўлічваюцца. Маецца на ўвазе, што калі падлетак сам «правакуе» на такія дзеянні ці проста не супраць, то дарослы ўсё роўна будзе абвінавачаны.
Таму зусім незразумела, што адбылося. У любым выпадку міліцыянеру пагражае ад 3 да 6 гадоў турмы са штрафам і пазбаўленнем права займацца пэўнай дзейнасцю.
Гэтая публікацыя зробленая з дапамогай Digital Intelligence Team. Гэта OSINT-праект, які супрацоўнічае з Кіберпартызанамі і іншымі прадэмакратычнымі структурамі ды праектамі, якія падзяляюць дэмакратычныя каштоўнасці.
«Наша Нiва» — бастыён беларушчыны
ПАДТРЫМАЦЬ
Каментары