У Жэневе пачаўся новы раўнд трохбаковых перамоваў паміж Украінай, ЗША і Расіяй. Пра гэта паведаміў кіраўнік украінскай дэлегацыі, сакратар Рады нацыянальнай бяспекі і абароны Рустэм Умераў, паведамляе «Еўрапейская праўда».
Па словах Умерава, падчас сустрэчы плануецца абмеркаваць пытанні бяспекі і гуманітарныя тэмы. Ён адзначыў, што ўкраінскі бок настроены працаваць канструктыўна і без завышаных чаканняў, імкнучыся да рашэнняў, якія могуць наблізіць устойлівы мір.
Акрамя Умерава, Украіну на перамовах прадстаўляюць кіраўнік Офіса прэзідэнта Кірыла Буданаў, яго першы намеснік Сяргей Кісліца, кіраўнік фракцыі «Слуга народа» Давід Арахамія, начальнік Генштаба УСУ Андрэй Гнатаў і намеснік кіраўніка ГУР Вадзім Скібіцкі.
Расійскую дэлегацыю ўзначальвае памочнік прэзідэнта РФ Уладзімір Мядзінскі.
З амерыканскага боку ўдзельнічаюць спецпасланнік прэзідэнта ЗША Стыў Уіткаф, зяць Дональда Трампа Джарэд Кушнер, міністр арміі Дэн Дрыскал і галоўнакамандуючы Аб’яднанымі ўзброенымі сіламі НАТА ў Еўропе генерал Алексус Грынкевіч.
Напярэдадні сустрэчы прэзідэнт ЗША Дональд Трамп заявіў, што Украіне варта як мага хутчэй сесці за стол перамоў з Расіяй. Прэзідэнт Украіны Уладзімір Зяленскі, у сваю чаргу, выказаў надзею, што перамоўны працэс з удзелам ЗША і РФ не будзе запаволены з-за змяненняў у складзе расійскай дэлегацыі.
Цяпер чытаюць
Трагедыя з 30‑гадовай доктаркай са Старобіна — пайшла выдаляць зуб мудрасці і памерла20
Каментары