Некалькі нямецкіх СМІ напісалі, што Германія ў мэтах эканоміі замарожвае дадатковыя выплаты Украіне на 2025 год. Ці значыць гэта, што дапамога прыпыніцца? У МЗС Украіны і міністэрстве фінансаў Германіі адказалі на гэтыя заявы.
Выданні BILD і Frankfurter Allgemeine Zeitung напісалі пра замарозку дадатковых выплат Украіне. Скаазана, што бягучыя кантракты ФРГ выканае, але новых запытаў ад Мінабароны Украіны прымаць не будзе. У 2024 годзе Берлін павінен вылучыць на падтрымку Украіны восем мільярдаў еўра, на 2025 год запланавана чатыры мільярды еўра — звыш гэтага, як сцвярджалі выданні, дапамогі не будзе, бо гэта не закладзена ў нямецкім бюджэтным планаванні.
Спікер Міністэрства замежных спраў Украіны Георгій Ціхі ў каментары Укрінфарму абверг гэта.
«Паведамленні аб тым, што Германія нібыта спыняе ваенную дапамогу Украіне, некарэктныя. Гэта такая ж маніпуляцыя, як і папярэднія паведамленні аб скарачэнні дапамог на наступны год удвая».
Па словах спікера, бюджэт ФРГ будзе зацверджаны ў лістападзе гэтага года — толькі тады стане вядома, наколькі Берлін будзе дапамагаць Украіне з ваеннымі патрэбамі.
Выданне «Суспільне» звярнулася па каментар у міністэрства фінансаў Германіі. Там адзначылі, што двухбаковая дапамога з боку Нямеччыны ў будучыні будзе часткова перанесеная на міжнародныя праграмы. Гаворка ідзе, у прыватнасці, аб рашэнні краін G7 вылучыць Украіне крэдыты на 50 мільярдаў даляраў за кошт замарожаных расійскіх актываў.
Аднак у каментары напісалі, што федэральны ўрад падтрымлівае Украіну ў фінансаванні і аснашчэнні вайсковай тэхнікай у такой ступені, якой не робіць гэтага ні адзін іншы еўрапейскі партнёр. Гэтай мэты служыць артыкул «мадэрнізацыя» ў федэральным бюджэце на 2024 год, а таксама мэтавыя асігнаванні на наступныя гады.
«Федэральнае міністэрства фінансаў гатова разгледзець магчымасць кароткатэрміновага прадастаўлення дадатковых сродкаў да таго часу. Для гэтага, аднак, дадатковыя патрэбы павінны быць дакладна вызначаныя і зразумелыя, каб адпавядаць усім бюджэтным правілам і на гэтай аснове можна было звярнуцца ў бундэстаг з просьбай аб выдачы дазволу», — адзначылі ў Мінфіне ФРГ.
У прэс-службе нямецкага ведамства дадалі, што яшчэ не атрымалі ніводнага канкрэтнага паведамлення аб патрабаваннях. «Таму ні разгляд, ні рашэнне не могуць быць прынятыя», — рэзюмавалі там.
У ліпені 2023 года канцлер Нямеччыны Олаф Шольц анансаваў перадачу зброі Украіне на суму 19 мільярдаў даляраў, якая разлічана да 2027 года, нагадвае «Суспільне».
А ў жніўні 2024-га генерал-маёр бундэсвера Крысціян Фройдынг заявіў, што ў гэтым годзе аб'ём ваеннай дапамогі Германіі Украіне будзе дасягаць ад 6,5 да 7 мільярдаў еўра.
Цяпер чытаюць
Коля Лукашэнка сядзіць побач з бацькам і Пуціным на Краснай плошчы3
Каментары
Для ... у меня плохие новости. В следующм году запланирована поставка не мение 100 Лео, 4 больших ПВО, несколько десятков маленьких, до 2 млн 155 мм. А вы , ..., теште себя далее глупыми надеждами.