Павел Севярынец расказаў у сацсетках, як на з’езд Беларускай хрысціянскай дэмакратыі ў Беластоку прыйшлі дзяўчыны з заданнем здымаць відэа з удзельнікамі.
Калі робіш з'езд палітычнай партыі, негалоснае правіла — пры магчымасці павітацца і перакінуцца парай словаў з кожным дэлегатам ці госцем. 24 кастрычніка ў Беластоку гэтае правіла спрацавала найлепшым чынам.
На пачатку рэгістрацыі абыходжу залю і хол, гляджу — стаіць незнаёмая дзяўчына гадоў дваццаці, быццам нечым напалоханая. Падыходжу, вітаюся. Пачынаю размаўляць — як вы, што вы, адкуль даведаліся пра З'езд БХД… Глядзіць на мяне, быццам на іншапланецяніна. Бачу — не разумее па-беларуску. Ага.
— А кто вас прігласіл?
— А вот этот человек, — паказвае ў тэлефоне кантакт. — Сделать жівые відео с участнікамі съезда.
— Прекрасно, — кажу. — А вы откуда?
— Я с Украіны.
— Героям слава. Ідёмте со мной.
Анатоль, бяспека. Ветліва распытвае, фотае кантакт «таварыша з операддзела», тлумачыць дзяўчыне, што да чаго — а я ўжо краем вока фіксую сумятню ля століка рэгістрацыі гасцей. Зноў гучыць «Жівое відео».
На З'езд спрабуе ў якасці госця зарэгістравацца яшчэ адна дзяўчына. Тая ж гісторыя.
У двубоі БХД супраць КГБ Беларуская Хрысціянская Дэмакратыя павяла 2:0.
Каментары