Каралеўскую сядзібу Панятоўскага ў Гродне прадаюць танней за старую аднапакаёўку
Цану на былую каралеўскую рэзідэнцыю Панятоўскіх у Панямуні зноў знізілі. Прадаць палац ніяк не атрымліваецца, піша Hrodna.life.
Былы палац апошняга караля польскага і вялікага князя літоўскага Станіслава Аўгуста Панятоўскага ў Панямуні зноў выставілі на продаж. Цану чарговы раз знізілі — цяпер да 70,2 тыс.руб. (21 тыс. даляраў) без ПДВ. За такую суму ў Гродне цяпер складана знайсці нават старую аднапакаёвую кватэру.
Будынак размешчаны па адрасе: Прагулачная, 15/1. Агульная плошча — 271,2 кв. м. да былой рэзідэнцыі прылягае зямельны ўчастак плошчай 0,1054 га.
Пакупніку, хутчэй за ўсё, прыйдзецца заплаціць ПДВ у памеры 20%. У такім выпадку кошт складзе 84 тысячы 240 рублёў. Аўкцыён адбудзецца 12 лістапада. Будынак афіцыйна прызначаны для правядзення спецыялізаваных культурна-асветніцкіх мерапрыемстваў і відовішчаў. Яго прызначэнне не змянілася з часоў клуба, які знаходзіўся ў палацы ў савецкі час. Будынак належыць ТАА «Гроднапрамтэхніка».
Былая сядзіба прызнана нерухомай гісторыка-культурнай каштоўнасцю. Пакупнік павінен падпісаць ахоўнае абавязацельства на працягу месяца пасля продажу. Калі ён не выканае ўмоў аўкцыёну, дзяржава зможа канфіскаваць маёмасць.
Сядзіба ў Панямуні была пабудавана ў 1771 годзе ў стылі позняга барока італьянскім архітэктарам Джузэпэ Сака. Тут размяшчалася рэзідэнцыя апошняга манарха Рэчы Паспалітай Станіслава Аўгуста Панятоўскага, а пазней сядзібы шляхецкіх родаў.
Будынак быў цагляным, атынкаваным, з чатырохкалонным порцікам на высокім цокалі. Большая частка арыгінальнага будынка страчаная. На аўкцыён выстаўлена частка з невялікім фрагментам арыгінальных сцен. Да яе прыбудаваны двухпавярховы драўляны корпус з адрасам Прагулачная, 15. У гэтым корпусе знаходзяцца жылыя кватэры.
Былую рэзідэнцыю ў Панямуні пачалі прадаваць вясной 2023 года з пачатковым коштам 374 тыс.руб. затым кошт паступова зніжалі. У верасні 2024 года цана ўпала ўдвая і склала 175,5 тыс.руб. цяпер цану знізілі яшчэ раз.
Каментары