Cambridge Dictionary (Кембрыджскі слоўнік) назваў словам 2024 года дзеяслоў «маніфеставаць» («manifest»). Аб гэтым арганізацыя паведаміла на сваім сайце.
Згодна з вызначэннем універсітэта, «маніфеставаць» азначае «выкарыстоўваць метады, такія як візуалізацыя і афірмацыя, каб дапамагчы сабе ўявіць дасягненне чаго-небудзь жаданага, з верай, што гэта дапаможа гэтага дасягнуць».
Карыстальнікі інтэрнэту шукалі гэтае слова амаль 130 тысяч разоў на працягу года. Як лічаць у Кембрыджы, гэты дзеяслоў «спыніў сваё асноўнае выкарыстанне ў супольнасці самадапамогі і ў сацыяльных сетках і стаў шырока ўзгадвацца ў асноўных СМІ».
Яго выкарыстоўвалі вядомыя артысты, спартсмены і ўплывовыя прадпрымальнікі. Сярод іх былі гімнастка Сімона Байлз, лёгкаатлет Эзра Фрэх, спявачкі Сабрына Карпентэр і Дуа Ліпа.
«Калі мы абіраем слова года па версіі Кембрыджскага слоўніка, мы кіруемся трыма фактарамі: данымі пра карыстальнікаў, духам часу і мовай», — патлумачыў менеджар па выдавецкай дзейнасці Вендалін Ніколс.
У Кембрыджы адзначылі, што слова «маніфеставаць» існуе ўжо некалькі стагоддзяў, але яго значэнне змянілася. Спачатку гэты дзеяслоў, што прыйшоў у англійскую мову з лаціны і французскай, азначаў «лёгка заўважны або відавочны», а потым — «паказаць нешта ясна».
«Маніфеставаць» абышло ў барацьбе за тытул слова года такія, як «брат» («brat»), «экатарыянец» («ecotarian») і «стойкасць» («resilience»).
Увагу спецыялістаў Кембрыджскага слоўніка ў 2024 годзе таксама прыцягнулі словы «квішынг» («quishing»), «рэсэнтыізм» («resenteeism»), «джымфлюенсар» («gymfluencer»), «вампір» («vampire») і выраз «праблема кактэйльнай вечарынкі» («cocktail party problem»)
Цяпер чытаюць
На нарадзе ў Лукашэнкі публічна пасварыліся чыноўнікі. Ён не ведаў, каго падтрымаць15
Каментары