У Беларусі банкрутуе кампанія, звязаная з украінскім анлайн-кінатэатрам
У Мінскім эканамічным судзе разглядаюць справу аб банкруцтве беларускага ўнітарнага прадпрыемства «Мегого», звязанага з уладальнікамі ўкраінскага анлайн-кінатэатра Megogo. Яго ўласнік — кіпрская кампанія Senseira Trading Limited, якую звязваюць з заснавальнікам і генеральным дырэктарам сэрвісу, украінскім бізнэсменам Уладзімірам Баравіком. Судовыя дакументы апублікаваныя на партале Адзінага дзяржаўнага рэестра даных аб банкруцтве, піша Office Life.
Беларускае прадпрыемства «Мегого» зарэгістравалі ў 2012 годзе са статутным фондам у 20 тысяч даляраў, які быў цалкам сфармаваны. Асноўным відам дзейнасці ў рэгістрацыйных дакументах пазначаная рэклама.
З судовага рашэння нельга дакладна вызначыць, чым займалася кампанія і што прывяло яе да банкруцтва. У красавіку 2025 года кіпрскі ўласнік прыняў рашэнне ліквідаваць беларускае прадпрыемства. Аднак у кампаніі амаль няма актываў: іх кошт ацэньваецца менш як у 15 тысяч рублёў. Пры гэтым запазычанасць па падатках і зборах перавышае 162 тысячы рублёў. Таму прадпрыемству давядзецца прайсці працэдуру банкруцтва.
Senseira Trading Limited раней была канчатковым бенефіцыярам украінскага Megogo і заснавальнікам расійскай даччынай кампаніі анлайн-кінатэатра — ТАА «Мегого».
Пазней Уладзімір Баравік аформіў статус бенефіцыяра асноўнай структуры на сябе асабіста, а расійская кампанія перайшла да іншай кіпрскай структуры — Magavin Enterprises Limited. У СМІ раней паведамлялі, што гэтыя кампаніі могуць быць звязаныя паміж сабой: у іх, паводле публікацый, быў падобны склад рады дырэктараў. Акрамя таго, Senseira засталася залогатрымальнікам у Magavin.
У 2022 годзе Megogo закрыў доступ да свайго кантэнту з Расіі. У Беларусі сэрвіс працаваў да 2024 года, калі Міністэрства па падатках і зборах заблакавала яго. У ведамстве тады патлумачылі гэта запазычанасцю ў падатках.
Цяпер чытаюць
Сын міністра Кубракова стаў начальнікам Цэнтральнага РУУС Мінска. Маёр, але будзе кіраваць палкоўнікамі1
Сын міністра Кубракова стаў начальнікам Цэнтральнага РУУС Мінска. Маёр, але будзе кіраваць палкоўнікамі
«Пасля першага забойства з ім развялася жонка». Што вядома пра шматдзетнага Сяргея са Столінскага раёна, які пасля вызвалення з калоніі забіў трох чалавек33
Каментары