У беларускіх лясах пайшлі зімовыя апенькі. Якія яшчэ грыбы не спужаліся першых снегападаў?
Першыя снегапады зусім не спалохалі заядлых беларускіх грыбнікоў, а начныя замаразкі не прымусілі ўсіх схаваць нажы і кошыкі да вясны. Тыя, хто ўпарта не хоча закрываць грыбны сезон і пры першай жа магчымасці зрываецца ў лес, як паказваюць фотасправаздачы ў тэматычных чатах і суполках, атрымліваюць заслужаную ўзнагароду. Днямі ў сацсетках з'явіліся здымкі першых у гэтым сезоне зімовых апенек, піша Telegraf.news.
Фатаграфіяй цэлай сям'і ярка-аранжавых грыбоў, якія абляпілі вербавы пень, раніцай 23 лістапада падзялілася ў суполцы «ВКонтакте» «Грибы: Грибные войска Беларуси» Нэлі Яловік з Мінска.
У тэматычным тэлеграм-канале беларускіх грыбнікоў удзельніца з Пінска таксама падзялілася фота першых фламулін, якія вылезлі, нягледзячы на выпаданне снегу.
Нягледзячы на тое, што гэты від можа збянтэжыць недасведчаных грыбнікоў, ён з'яўляецца ядомым і лічыцца, што не губляе сваіх смакавых якасцяў, нават калі яго прыхопіць марозам. Збіраць гэты від можна і ў замарожаным выглядзе і, як заяўляюць спецыялісты, нават адталыя грыбы — сапраўдны дэлікатэс, паколькі па смаку нагадвае далікатныя морапрадукты.
Варта адзначыць, што ў зімовай апенькі ёсць атрутны двайнік. Таму пры зборы грыбоў у лесе варта заўсёды прытрымлівацца правіла: збіраць толькі тыя грыбы, у ядомасці якіх упэўненыя на 100%. Калі вы сумняваецеся, лепш не кладзіце грыб у свой кошык.
Іншай удзельніцы суполкі «Грибы: Грибные войска Беларуси» Таццяне Старковай у Мінскім раёне перад выходнымі па-сапраўднаму пашанцавала ў гэтым сэнсе: яна сабрала цэлых 1,5 кг фламуліны, «забегшы на гадзінку праверыць зімовыя градкі».
Зрэшты, не толькі фламуліну прыносілі грыбнікі ў апошнія дні з беларускіх лясоў, якія ўжо прысыпала першым снегам. Многія вырашылі ў гэтыя выхадныя «закрыць сезон» і падзяліліся апошнімі фотасправаздачамі — радоўкі самых розных відаў, восеньскія апенькі, вешанкі і нават дрыжалкі.
«Прыгажосць, снег вакол, лужыны ў лёдзе, з людзей, акрамя мяне — ні душы. Паветра ўжо па зімоваму свежае. Але такога і чакаць не мог: падзялёнкі, зялёнкі, апенькі. Усе ўжо ледзяныя. Але яшчэ большай для мяне нечаканасцю стала знайсці ў лістападзе 2 лісічкі», — падзяліўся сваім уловам пад закрыццё сезона іншы ўдзельнік тэматычнай суполкі з Мінскага раёна.
Цяпер чытаюць
Хітры расіянін Яўген з жонкай і малым прыдумалі, як бясплатна пажыць у кватэры беларускі31
Каментары