Чаму даляр рэзка падаражэў да 3,5 рубля і чаго чакаць у бліжэйшай будучыні? Спыталі ў эксперта
Далейшы лёс беларускага рубля выглядае не надта аптымістычным.
Паглядзіце на Расію
Імклівае аслаблення курсу беларускага рубля эксперт BEROC Анастасія Лузгіна ў першую чаргу тлумачыць тым, што адбываецца з курсам рубля расійскага.
«Расійскі нядаўна пераадолеў псіхалагічны бар'ер у 100 рублёў за даляр, і курс працягвае расці. Беларускі рубель шмат у чым паўтарае траекторыю расійскага. За апошнія 4 месяцы курс рубля беларускага таксама знізіўся больш, чым на 10%. Пры гэтым да расійскага ён умацаваўся без малога на 5%», — тлумачыць Лузгіна.
Наш рубель паўтарае паводзіны расійскага, хоць і не цалкам. Калі расійская валюта будзе далей таннець, то і беларускі рубель гэта чакае.
«На сёння захоўваецца моцная сувязь з Расіяй, таму ў бліжэйшы перыяд хутчэй за ўсё мы будзем працягваць назіраць плаўнае зніжэнне рубля да даляра», — лічыць эксперт.
Чаму падае рубель расійскі?
Сярод прычын, чаму так імкліва таннее рубель расійскі, Лузгіна называе наступныя фактары.
«У Расіі адбываецца пагаршэнне сальда гандлёвага балансу за кошт зніжэння аб'ёмаў экспарту нафты ў выніку таго, што Індыя моцна абмежавала куплю расійскай нафты».
Другім фактарам эканаміст называе праблемы з разлікамі ў выніку санкцый.
«Мноства тавараў і паслуг, якія экспартуюцца з Расіі, аплачваюцца рублямі. А вось разлік за імпарт не заўсёды адбываецца ў расійскай валюце, што прыводзіць да валютнага дысбалансу», — тлумачыць Лузгіна.
Чаго чакаць далей?
Яшчэ адзін фактар, на які звяртае ўвагу эксперт, — умацаванне даляра на сусветным рынку да еўра і іншых валют.
З пачатку года дэвальвацыя беларускага рубля да даляра склала каля 9%. А да кошыку валют наш рубель застаецца даволі стабільным.
Таму можна казаць, што на курс цяпер у асноўным уплывае расійскі фактар.
«Для далейшага разумення трэба глядзець, што будзе адбываецца ў гандлёвым балансе Беларусі. Па даных за верасень мы бачым, што сальда пагоршылася, але, магчыма, на гэта паўплывалі разавыя фактары, такія, як новыя санкцыі. Імпарцёры імкнуліся паспець увезці тавары празапас да ўступлення новых абмежаванняў з кастрычніка. Таму ўжо зыходзячы са звестак за кастрычнік можна будзе меркаваць — гэта тэндэнцыя да пагаршэння або разавая акцыя».
Што тычыцца ўнутрыбеларускага фактару, то многае будзе залежаць ад таго, ці будуць улады і далей спрабаваць разганяць рост ВУП.
«Спажыванне нехарчовых тавараў у Беларусі за 10 месяцаў вырасла на 17,8% у параўнанні са студзенем-кастрычнікам мінулага года.
Гэтаму спрыяў рост заробкаў і павелічэнне аб'ёмаў выдачы крэдытаў. У той жа час спажыванне харчовых тавараў паказала больш сціплыя вынікі павелічэння — на 5,7%. І тут важна разумець, што значная доля менавіта нехарчовых тавараў, попыт на якія вырас, прыпадае на імпарт, што негатыўна ўплывае на сальда гандлёвага балансу.
Імпарт спажывецкіх нехарчовых тавараў за студзень-верасень у параўнанні з аналагічным перыядам мінулага года вырас на 14,9%, ці амаль на 1 млрд даляраў», — адзначае Анастасія Лузгіна.
Далейшае развіццё сітуацыі з курсам, на думку Лузгіной, будзе шмат у чым залежаць ад дзеянняў адміністрацыі Трампа.
«Калі Трамп будзе стымуляваць павелічэнне аб'ёмаў здабычы нафты, то цэны на яе яшчэ больш знізяцца, што будзе адчувальным ударам па расійскай эканоміцы. Калі гэтага не здарыцца, то хутчэй за ўсё будзе назірацца плаўнае зніжэнне курсу на працягу канца гэтага года і першай палове наступнага», — адзначае эксперт.
Цяпер чытаюць
Міліцыя затрымала таго самага расійскага турыста, які кінуў недакурак на вуліцы. Заўтра суд16
Каментары