Адзін з найлепшых беларускіх футбалістаў за ўсю гісторыю Сяргей Алейнікаў стаў спартыўным дырэктарам клуба «Лакаматыў» з Плоўдзіва ў Балгарыі, паведамляе «Трыбуна».
Кантракт з Сяргеем Алейнікавым заключаны на два гады.
У гэтым сезоне «Лакаматыў» пасля 19-ці тураў займае 13-е з 16 месцаў ў турнірнай табліцы.
За гэты клуб, дарэчы, выступае беларускі паўабаронца Уладзімір Мядзведзь.
63-гадовы Сяргей Алейнікаў, бадай, найлепшы беларускі футбаліст XX стагоддзя. Ён нават быў афіцыйна прызнаны такім у 2003 годзе, калі адзначалася 50-годдзе УЕФА і кожная еўрапейская краіна вызначала сваіх найлепшых футбалістаў за перыяд з 1954 па 2003 гады.
Алейнікаў гуляў у залатым складзе мінскага «Дынама», якое ў 1982 годзе стала пераможцам чэмпіяната СССР, правёў 73 гульні за зборную СССР, разам з ёй у 1988 годзе заваяваўшы срэбраныя медалі чэмпіяната Еўропы. Акрамя таго, ён змог на заключным этапе кар'еры гульца крыху пагуляць за знакаміты італьянскі «Ювентус».
Пасля заканчэння кар'еры Алейнікаў стаў трэнерам, але тут у яго ўсё склалася горш, чым у гульца. У асноўным ён трэніраваў італьянскія клубы, але з ніжэйшых дывізіёнаў, прытым асаблівых поспехаў з імі не дабіваўся.
У 2020 годзе Алейнікаў падтрымаў пратэсты супраць фальсіфікацыі прэзідэнцкіх выбараў у Беларусі, ён тады заявіў:
«Відавочна, што ў Беларусі да народа ставяцца па-наплявальніцку. Улады ні на што не звяртаюць увагі, робяць, што хочуць. Груба кажучы, беларусаў ні ў што не ставяць. І такая колькасць працэнтаў за дзейнага прэзідэнта не здзівіла, а, як ужо сказаў, выклікала абурэнне і адно пытанне: колькі наогул гэта можа працягвацца?»
Футбольная зборная Беларусі паедзе гуляць з таджыкамі
Праўнук Мусаліні забіў першы гол на дарослым узроўні: заўзятары пачалі зігаваць і скандаваць яго прозвішча
Мінскае «Дынама» прайграла пяць з шасці матчаў Лігі канферэнцый, разгромна саступіўшы ў апошнім ад грэкаў
Экс-гульца чэмпіянату Беларусі могуць прадаць у англійскую прэм'ер-лігу за 30 мільёнаў еўра
Герой Беларусі Марына Васілеўская нарадзіла дачку ад касманаўта Алега Навіцкага16
Каментары