У студзені 2025 года прыняў рашэнне закрыць свой бізнэс у Еўрасаюзе вядомы беларускі касметычны холдынг «Беліта-Вітэкс», высветліў Plan В. Прычыны рашэння невядомыя.
Дзесяць гадоў — у топку гісторыі
У заснавальніка беларускай касметычнай галіны, які вырабляе сотні найменняў крэмаў, шампуняў, геляў і іншае, з 2013 года існаваў цалкам легальны канал паставак на рынак Еўрасаюза — зарэгістраваная ў Латвіі дыстрыб'ютарская кампанія Euro B&V.
«Беліта-Вітэкс» першапачаткова стваралася з удзелам італьянскіх інвестараў, каб задавальняць патрэбы ў якаснай касметыцы жыхароў Беларусі і астатняй постсавецкай прасторы. Аднак пасля таго, як гэты рынак быў у асноўным асвоены, яе ўладальнікі рызыкнулі паспрабаваць свае сілы і ў Еўропе.
Латвія стала базавай краінай. На афіцыйным сайце вытворцы да гэтага часу значацца звыш дзясятка крам Euro B&V у Рызе, Юрмале і Елгаве. Гандлёвыя пункты таксама ёсць у Румыніі і Чэхіі.
Касметыку беларускіх брэндаў «Беліта» і «Вітэкс» можна было купіць па іншых каналах у Польшчы і іншых краінах Еўрасаюза.
Наколькі паспяховы быў еўрасаюзаўскі бізнэс «Беліты-Вітэкс»?
Еўрасаюзаўскі бізнэс «Беліты» даволі паспяховы, калі ўлічыць што адзін з самых канкурэнтных рынкаў свету даўно падзялілі транснацыянальныя карпарацыі накшталт Unilever, Henkel і т.п. Напрыклад, нават у «кавідны» 2020-ы год, паводле справаздачы, Euro B&V нагандлявала на 1,5 млн еўра і была прыбытковай.
У наступныя два гады продажы праселі да каля мільёна еўра і бізнэс пайшоў у страты. Але ўжо ў 2023 годзе сітуацыя выправілася. Пры выручцы прыкладна мільён еўра Euro B&V ізноў выйшла на прыбытковасць. Для параўнання: аб'ём продажаў расійскай дачкі «Беліта-Вітэкс-С» у гэтым жа годзе быў большы ў тры разы.
Звестак па 2024 годзе яшчэ няма. Магчыма, зыходзячы з іх, можна было б зразумець, што прымусіла ўладальнікаў «Беліта-Вітэкс» сабрацца і прыняць рашэнне аб ліквідацыі бізнэсу ў Еўропе.
Каментары