«Котаправод». У тыктоку не могуць разгадаць прызначэнне дзіўнай канструкцыі паміж дамамі ў Фаніпалі
Каментатары прапануюць свае забаўныя варыянты ад манарэйкі да хода для палюбоўніка, але сапраўдная прычына з’яўлення канструкцыі, відаць, палягае ў абыходзе беларускіх нормаў.
У роліку, які апублікавала карыстальніца пад нікам LikaStar888, відаць металічную канструкцыю на трох магутных слупах, якая па крывой дузе цягнецца ад глухога тарца аднаго жылога панэльнага дома да іншага, праходзячы над дваровай паркоўкай. Прыдумаць якое-небудзь рацыянальнае тлумачэнне, для чаго магла спатрэбіцца такая гаргара, складана.
«Растлумачце мне, калі ласка, што гэта такое паміж дамамі», — просіць аўтарка роліка.
Каментатары адгукнуліся на яе просьбу і пачалі прапаноўваць свае іранічныя тлумачэнні пра прызначэнне дзіўнай канструкцыі:
«Пусцяць метро»,
«Котаправод»,
«Гэта каб дываны выбіваць»,
«Там жыве нечая палюбоўніца. Каб не скакаць з балкона»,
«Дамы трымаюць адзін за аднаго, каб не паваліцца»,
«Гэта манарэйкавая дарога, паміж дамамі будзе хадзіць падвесны вагон», — жартуюць каментатары пад відэа.
Былі і больш сур’ёзныя адказы, маўляў, па канструкцыі пусцяць трубу, па якой будзе цячы вада. Праўда, шматпавярховыя дамы не маюць патрэбы ў такіх канструкцыях, якія да таго ж нікуды не вядуць.
Найбольш праўдападобнай выглядае версія, што канструкцыя з’явілася, каб забудоўшчык змог абысці беларускае заканадаўства і будаўнічыя нормы і выдаць два дамы за адзін, пад будаўніцтва якога ён атрымаў участак.
Забудоўшчык карыстаўся самым прымітыўным спосабам забудовы, які паўсюдна практыкуецца ў Беларусі — проста прывязваў гатовыя тыпавыя праекты да мясцовасці. Відаць, яму вельмі хацелася зарабіць як мага больш са свайго ўчастка, але не хацелася плаціць за індывідуальны праект вялікага дома, таму ён проста ўціснуў дзве панэлькі. Але ўсё пайшло не так гладка.
У 2018 годзе на гэтую канструкцыю ўжо звяртаў увагу «Анлайнер», журналістам якога мясцовыя жыхары распавялі, што другі дом доўга не хацелі прымаць у эксплуатацыю і нават палічылі самабудам, але зусім нядаўна ўсё ж узгаднілі і выдалі на яго тэхпашпарт.
Тэарэтычна, паколькі дамы маюць супольныя будаўнічыя канструкцыі, якія няхай і не выконваюць аніякай функцыі, то яны лічацца адным будынкам. Гэтую здагадку пацвярджае і тое, што абодва дамы знаходзяцца па адным адрасе — Зялёная вуліца, 2Д.
Гэтую канструкцыю можна было б творча абыграць, зрабіць з яе разынку і ўпрыгажэнне непрывабнага двара, але быў выбраны танны і непрыгожы варыянт, за які ўсё роўна заплацілі жыхары дома.
«Наша Нiва» — бастыён беларушчыны
ПАДТРЫМАЦЬЦяпер чытаюць
Беларусаў па вяртанні дамоў на мяжы ўсё часцей раздзяваюць дагала21
Каментары
Сорамна, што калі трэба, то не выкарыстоўваецца норма "злоўжыванне правам" - фармальна правамернае, але заведама нядобрасумленнае дзеянне (бяздзеянне).
Намер падмануць і нядобрасумленнасць відавочныя, нахабна відавочныя, але дзяржаўны механізм гэта не зацікавіла.