«Kotapravod». U tyktoku nie mohuć razhadać pryznačeńnie dziŭnaj kanstrukcyi pamiž damami ŭ Fanipali

U roliku, jaki apublikavała karystalnica pad nikam LikaStar888, vidać mietaličnuju kanstrukcyju na troch mahutnych słupach, jakaja pa kryvoj duzie ciahniecca ad hłuchoha tarca adnaho žyłoha panelnaha doma da inšaha, prachodziačy nad dvarovaj parkoŭkaj. Prydumać jakoje-niebudź racyjanalnaje tłumačeńnie, dla čaho mahła spatrebicca takaja harhara, składana.

«Rastłumačcie mnie, kali łaska, što heta takoje pamiž damami», — prosić aŭtarka rolika.

@likastar888 Dla čieho eto nužno? #biełaruś #riekomiendacii #riek #topčik #toptiktok #fanipol #most ♬ orihinalnyj zvuk - LikaStar888

Kamientatary adhuknulisia na jaje prośbu i pačali prapanoŭvać svaje iraničnyja tłumačeńni pra pryznačeńnie dziŭnaj kanstrukcyi:

«Puściać mietro»,
«Kotapravod»,
«Heta kab dyvany vybivać»,
«Tam žyvie niečaja paluboŭnica. Kab nie skakać z bałkona»,
«Damy trymajuć adzin za adnaho, kab nie pavalicca»,
«Heta manarejkavaja daroha, pamiž damami budzie chadzić padviesny vahon», — žartujuć kamientatary pad videa. 

Byli i bolš surjoznyja adkazy, maŭlaŭ, pa kanstrukcyi puściać trubu, pa jakoj budzie ciačy vada. Praŭda, šmatpaviarchovyja damy nie majuć patreby ŭ takich kanstrukcyjach, jakija da taho ž nikudy nie viaduć. 

Najbolš praŭdapadobnaj vyhladaje viersija, što kanstrukcyja źjaviłasia, kab zabudoŭščyk zmoh abyści biełaruskaje zakanadaŭstva i budaŭničyja normy i vydać dva damy za adzin, pad budaŭnictva jakoha jon atrymaŭ učastak. 

Zabudoŭščyk karystaŭsia samym prymityŭnym sposabam zabudovy, jaki paŭsiudna praktykujecca ŭ Biełarusi — prosta pryviazvaŭ hatovyja typavyja prajekty da miascovaści. Vidać, jamu vielmi chaciełasia zarabić jak maha bolš sa svajho ŭčastka, ale nie chaciełasia płacić za indyvidualny prajekt vialikaha doma, tamu jon prosta ŭcisnuŭ dźvie panelki. Ale ŭsio pajšło nie tak hładka.

Pavialičyć

U 2018 hodzie na hetuju kanstrukcyju ŭžo źviartaŭ uvahu «Anłajnier», žurnalistam jakoha miascovyja žychary raspaviali, što druhi dom doŭha nie chacieli prymać u ekspłuatacyju i navat paličyli samabudam, ale zusim niadaŭna ŭsio ž uzhadnili i vydali na jaho techpašpart. 

Tearetyčna, pakolki damy majuć supolnyja budaŭničyja kanstrukcyi, jakija niachaj i nie vykonvajuć anijakaj funkcyi, to jany ličacca adnym budynkam. Hetuju zdahadku paćviardžaje i toje, što abodva damy znachodziacca pa adnym adrasie — Zialonaja vulica, 2D.

Hetuju kanstrukcyju možna było b tvorča abyhrać, zrabić ź jaje razynku i ŭpryhažeńnie niepryvabnaha dvara, ale byŭ vybrany tanny i niepryhožy varyjant, za jaki ŭsio roŭna zapłacili žychary doma.

• 2
• 0
• 9
• 22
• 1
• 1
• 1
• 0