Сяброўка Веры Паляковай-Макей спрабуе прадаць элітны салон прыгажосці больш чым за мільён даляраў
Некалькі гадоў запар Наталля Лазарчык спрабавала выратаваць элітны салон прыгажосці «Ледзі Гадзіва». Але цяпер апусціла рукі і спрабуе прадаць салон — ці хаця б здаць у арэнду.
Наталля Лазарчык пазначана як мастачка па касцюмах у шматлікіх спектаклях Тэатра юнага гледача. Разам з яго дырэктаркай Верай Паляковай-Макей Наталля лятала ў Навасібірск, дзе беларусы паказвалі спектакль «Майстар і Маргарыта». Менавіта мастачка распавяла, што яна разам з удавой міністра Уладзіміра Макея трапілі ў жудасную аварыю па дарозе ў аэрапорт.
Цяпер Наталля падзялілася ў інстаграме, што прадае свой элітны салон прыгажосці «з 20-гадовай рэпутацыяй». «Ледзі Гадзіва» знаходзіцца ў цэнтры Мінску — на вуліцы Няміга, 38. На сайце realt.by пазначана, што ўладальніца хоча атрымаць за сваю маёмасць каля 4 мільёнаў рублёў — ці прыкладна 1,27 мільёна даляраў. У кошт уваходзіць памяшканне плошчай 306 квадратаў, а таксама ўсё абсталяванне салона прыгажосці. Але да торгу Наталля гатовая.
Мяркуючы па надта эмацыйным сторыс, рашэнне развітацца з салонам «Ледзі Гадзіва» далося жанчыне не вельмі проста. Але праблемы з гэтым бізнэсам былі ўжо не першы год. Яшчэ ў 2022 годзе Наталля скардзілася, што ад яе сышло 85% кліентаў.
Прычына таму банальная — майстры, якія працавалі ў «Ледзі Гадзіва», змянілі месца працы. Кагосьці перавабілі канкурэнты, хтосьці сам вырашыў арандаваць сабе працоўнае месца дзесьці яшчэ, а хтосьці стаў і дома працаваць.
Канечне, добры майстар заўсёды забярэ з сабой кліентуру. Наталля была ў шаленстве і плявалася атрутай у бок не вельмі добрасумленных канкурэнтаў.
— Салоны, якія даюць майстру 50%, гэта ўтопія працы. Кожны, хто ўмее лічыць, разумее: арэнда, камуналка, выдаткі, падаткі. У астатку нуль у лепшым выпадку, калі не мінус. Першаму майстру, які сышоў, далі высокі працэнт у разліку на маіх кліентаў і мелі рацыю. А чаго ёй праз год не папрасіць 60% ці 70%? Будзеце плаціць? А не тое і вашых кліентаў адвядзе, людзі ж прывыкаюць.
Жанчына была вельмі пакрыўджана на майстроў, якія звольніліся (кожны з якіх абвінаваціў яе ў бяздзейнасці). Маўляў, напрацавалі ў яе кліенцкую базу, а цяпер будуць класці сабе ў кішэню 100% прыбытку — «толькі цяпер незразумела на якой касметыцы і дзіўных умовах».
Дасталася і не вельмі ўдзячным кліентам: «Народ фарбуе валасы дома, мые галаву ў ваннай і нават не задае пытанне, чым. За 350 рублёў».
А больш за ўсё яе абуралі майстры, які працуюць у прыватных кабінетах ці дома.
— Усе праверкі і падаткі толькі для нас, уласнікаў, а ў дамах і кабінеціках адбываецца сваё ціхае і мірнае, а галоўнае сытае і бяспечнае жыццё.
Уладальніцу салона абурала тое, што цырульнікам і іншым супрацоўнікам б’юці-сферы афіцыйна дазволілі быць самазанятымі. Бо раней майстрам было страшна згубіць працу ў салоне, а пасля з’яўлення магчымасці працаваць самастойна людзі зразумелі, што няма вялікага сэнсу трымацца за месца.
— Наўрад ці бюджэт атрымлівае гэтыя грошы, а існаванне вялікіх салонаў, з атмасферай, духам і гісторыяй загублена.
Таксама скардзілася Наталля на дзяржаву — сцвярджала, што яе задзяўблі праверкамі розныя дзяржаўныя органы. Казала, што ўжываюцца толькі карныя меры, якія давялі яе да сівых валасоў.
Наталля спрабавала змагацца за тое, каб абараніць свой бізнэс, заклікала іншых бізнэсоўцаў б’юці-сферы аб’яднацца. Нават прапаноўвала стварыць антыкрызісны клуб дырэктараў і наняць юрыстаў, каб не загінуць па адным. Але ж ніхто не адгукнуўся.
У тым жа 2022 годзе Наталля ўдзельнічала ў мерапрыемстве Міністэрства эканомікі, дзе якраз абмяркоўвалі праблемы забеспячэння салонаў прыгажосці кадрамі, улічваючы магчымасць фізічных асоб аказваць паслугі ў б'юці-сферы.
Здаецца, сустрэча з намеснікам міністра эканомікі Наталлю натхніла:
— Нам сказалі: з 2023 года ў Беларусі ўвядуць падатак на прафесійны даход, а таксама паабяцалі звязацца з Цэнтрам гігіены і эпідэміялогіі і ўрэгуляваць пытанні ажыццяўлення бескантрольнай (з іх боку) дзейнасці суб’ектаў.
Але ж у выніку выратаваць свой уласны «Тытанік», які імкліва апускаўся пад ваду, Наталлі не ўдалося. Яна цяпер у адчаі і ў сваім інстаграме спрабуе знайсці пакупніка ці арандатара для «Ледзі Гадзівы».
— 20 гадоў я была тут шчаслівай. Можа, цяпер ваш час? Усё можна абмяркоўваць, люблю ідэйных!
Наталля літаральна просіць забраць той салон, каб у яе з’явілася магчымасць паставіць кропку ў гэтай гісторыі і пачаць нешта новае.
«Быццам гарачыя прасы паставілі на вочы». Беларуская вядучая шчыра расказала, на што пайшла дзеля прыгажосці
«Сталі ратункам, а потым і справай жыцця». Жыхарка Баранавіч уцякла з б'юцісферы і ператварыла хобі ў бізнэс
Belita выпусціла гель для душа, які «ўплывае на эмоцыі». Навуковец: «Гэта інфамахлярства»
«Вайлдберыз» прапаноўвае беларускам капсулы для «аднаўлення цнатлівасці»
Каментары