Перамовы Расіі і ЗША ў Эр-Рыядзе завяршыліся, пра вынікі паведамяць заўтра
Сустрэча амерыканскай і расійскай дэлегацый у сталіцы Саудаўскай Аравіі працягвалася больш за 12 гадзін, пра яе завяршэнне паведаміла МЗС Расіі.
Агенцтва «РИА Новости» піша са спасылкай на сваю крыніцу, што сумесная заява Расіі і ЗША па выніках перамоў будзе апублікаваная 25 сакавіка.
Дзярждэпартамэнт ЗША лічыць, што Расія і Украіна блізкія да поўнага спынення агню, заявіла кіраўніца прэс-службы Дзярждэпу Тэмі Брус.
Расійскі бок на перамовах, якія назвалі «тэхнічнымі кансультацыямі», прадстаўлялі старшыня камітэта Савета Федэрацыі па міжнародных справах Грыгорый Карасін і дарадца дырэктара ФСБ Сяргей Бяседа. У склад амерыканскай дэлегацыі ўвайшлі дырэктар па палітычным планаванні Дзярждэпу Майкл Энтон, старшы дырэктар па Еўропе ў Радзе нацыянальнай бяспекі Эндру Пік, а таксама памочнікі спецыяльнага пасланца па Украіне Кіта Келага і дарадцы Трампа па нацыянальнай бяспецы Майка Уолца.
Афіцыйна анансавалася, што нібыта галоўным пытаннем, якое абмяркоўвалася падчас гэтых перамоваў, было забеспячэнне бяспекі марскіх перавозак.
«Мы зыходзім з таго, што сёння на парадку дня пытанне «чарнаморскай ініцыятывы» і ўсіх звязаных тэм з аднаўленнем гэтай ініцыятывы, гэта была прапанова прэзідэнта Трампа, і прэзідэнт Пуцін даў на гэта згоду. Вось менавіта з такім мандатам наша дэлегацыя адправілася ў Эр-Рыяд»,— паведамляў прэсе прэс-сакратар Пуціна Дзмітрый Пяскоў.
Амерыканскі бок лічыць сустрэчу ў Эр-Рыядзе падрыхтоўкай да перамоў, на якіх будуць абмяркоўвацца пытанні падзелу тэрыторыі Украіны і ўмовы будучага міру.
Сустрэчы прадстаўнікоў Масквы і Вашынгтона папярэднічалі шасцігадзінныя перамовы дэлегацый ЗША і Украіны 23 сакавіка, на якіх абмяркоўвалася рэалізацыя прапановы па абароне энергетычных аб'ектаў і крытычнай інфраструктуры.
Расія на перамовах у Саудаўскай Аравіі патрабуе ўсю тэрыторыю чатырох украінскіх абласцей
Зяленскі: З Трампам абмяркоўвалі перадачу ЗША Запарожскай АЭС
Генсак НАТА «цалкам верыць» у здольнасць Трампа дамовіцца пра мір ва Украіне
Уіткаф пра акупаваныя ўкраінскія тэрыторыі: Пераважная большасць людзей паказала, што хоча быць пад уладай Расіі
Каментары