Урад скараціў пералік тавараў, якія падлягаюць цэнаваму рэгуляванню
Урад ужо шосты раз унёс змены ў пастанову №713, якой з восені 2022 года ў Беларусі рэгулююцца цэны. Дакументам, у прыватнасці, як раней анансаваў прэм'ер Аляксандр Турчын, скарочаны пералік тавараў, якія падлягаюць цэнаваму рэгуляванню.
Цяпер пазіцый, якія будуць рэгулявацца, засталося 211 з 331. Выключаныя са спісу тавары не штодзённага попыту і прэміум-класа. Норма запрацуе з 15 красавіка 2025 года.
Пад цэнавае рэгуляванне больш не будуць трапляць тавары, якія прадаюцца рэзідэнтам Беларусі для далейшага экспарту (пры ўзгадненні такой здзелкі з адпаведным дзяржаўным органам), а таксама тавары, што рэалізуюцца ў стэрыльных зонах аэрапортаў.
Для вытворцаў тавараў, цэны на якія рэгулююцца, вызначылі максімальны ўзровень рэнтабельнасці, пры захаванні якога павышэнне цэн не патрабуе ўзгаднення з дзяржаўнымі органамі.
Акрамя таго, на заканадаўчым узроўні зацверджаны пералік выдаткаў, якія нельга ўключаць у сабекошт прадукцыі.
Урад таксама вызначыў адзіную максімальную гандлёвую надбаўку на імпартную прадукцыю, незалежна ад колькасці пасярэднікаў ад мяжы да канчатковага продажу.
Згодна з рашэннем Савета Міністраў, да 1 мая 2025 года будуць дзейнічаць гранічныя цэны на бульбу, цыбулю, буракі, моркву, капусту і яблыкі. Пасля гэтай даты ў рознічным гандлі будуць устаноўленыя гранічныя надбаўкі. Мяркуецца, што такі падыход дапаможа захаваць даступнасць гэтых прадуктаў для насельніцтва.
19 сакавіка гэты крок анансаваў незадоўга перад тым прызначаны на пасаду прэм'ер-міністр Аляксандр Турчын, за што яго 28 сакавіка на нарадзе даволі рэзка раскрытыкаваў Лукашэнка:
«Новы прэм'ер-міністр пачынае варушыць старое, што: «Ну чаго там мы парымся, давайце скароцім напалову або на траціну кантраляваныя тавары, хай яны самі там павялічваюць кошт як хочуць, а вось гэтыя сацыяльна значныя тавары — гэта важна». А хто сказаў, што гэта сацыяльна значнае? Дапусцім, аўтамабіль для нас ужо перастаў быць сацыяльна значным. Ці ён сацыяльна значны? Ці залаты пярсцёнак? […] Дык гэта не сацыяльна значны тавар? Быццам бы не».
Тым не менш, як выглядае, Лукашэнку ўсё ж здолелі пераканаць у неабходнасці гэтага кроку.
Каментары
Недели не прошло с того момента, как он раскритиковал нового премьер-министра за намерение сократить на треть этот перечень товаров, подлежащих ценовому регулированию, и вот сегодня Турчин сократил перечень на 36% с 331 до 211...