Іспанія дамагаецца прызнання каталонскай мовы ў ЕС: Брусэль тармозіць працэс
Сем краін Еўрапейскага cаюза выказалі занепакоенасць фінансавымі і палітычнымі наступствамі прызнання каталонскай мовы адной з афіцыйных моў ЕС. Такое прызнанне стала б прэцэдэнтам, калі афіцыйнай мовай ЕС стае не дзяржаўная мова ўсёй краіны.
Як піша Politico.eu, у Еўрапейскім саюзе ўзнікла спрэчка вакол моўнай палітыкі. Іспанія дабіваецца, каб каталонская, галісійская і баскская мовы атрымалі афіцыйны статус у структурах ЕС. Гэта было абяцанне лідара іспанскіх сацыялістаў Педра Санчэса ўзамен за падтрымку каталонскімі дэпутатамі яго ўрада меншасці. Аднак просьба Мадрыда сутыкнулася з сур’ёзным супрацівам.
У 2023 годзе, у абмен на галасы дэпутатаў-каталонцаў, неабходную для атрымання вотуму даверу, прэм’ер Санчэс заключыў складаную палітычную дамову. Паводле яе, Іспанія абавязалася прасоўваць прызнанне каталонскай, бакскай і галісійскай у якасці афіцыйных моваў Еўрасаюза. Аднак для таго каб гэтая ініцыятыва ўступіла ў сілу, патрэбная аднагалосная падтрымка ўсіх 27 краін-членаў ЕС.
На наступным тыдні Іспанія плануе вынесці гэтае пытанне на галасаванне ў Радзе агульных пытанняў — органе, які рыхтуе рэгулярныя сустрэчы кіраўнікоў краін ЕС у Брусэлі. Аднак, як сведчаць дакументы з сустрэчы пастаянных прадстаўнікоў краін-членаў ЕС, якімі валодае Politico, у Брусэлі пануе скептыцызм і адсутнічае кансэнсус.
Бельгія, Кіпр, Партугалія, Нідэрланды, Румынія і Славакія падтрымалі прапанову Іспаніі, Харватыя, Чэхія, Фінляндыя, Францыя, Германія і Швецыя падтрымалі патрабаванне Італіі спачатку «вызначыць кошт і юрыдычныя наступствы» такой змены.
Мадрыд паабяцаў узяць на сябе ўсе выдаткі, звязаныя з перакладам і дакументацыяй, калі новыя мовы будуць прызнаныя за афіцыйныя. Але недавер застаецца: шэраг краін сумняваецца, што Іспанія будзе гатовая фінансаваць гэта доўгатэрмінова, асабліва з улікам таго, што няўстойлівы ўрад Санчэса яшчэ не правёў праз картэсы дзяржаўны бюджэт і знаходзіцца пад ціскам з боку НАТА адносна павелічэння выдаткаў на абарону.
Дадатковы фактар напружання — пагрозы з боку каталонскіх саюзнікаў у парламенце. Каталонская правацэнтрысцкая партыя Junts, чыя падтрымка неабходная, каб урад сацыялістаў устаяў, адкрыта выказвае незадаволенасць зацяжкай. Іх абурае, што дамоўленасці адносна моваў дагэтуль не выкананыя. Калі справа не зрушыцца з месца, гэта можа прывесці да новага палітычнага крызісу ў Мадрыдзе.
Іспанскі ўрад адмовіўся каментаваць сітуацыю для Politico, а прадстаўнікі Junts не пажадалі абмяркоўваць яе публічна.
Цяпер чытаюць
Дарафеева захапляецца Грэцыяй, а Лебедзева лашчыць капібар у Тайландзе. Дзе адпачываюць лукашэнкаўскія зоркі?2
Дарафеева захапляецца Грэцыяй, а Лебедзева лашчыць капібар у Тайландзе. Дзе адпачываюць лукашэнкаўскія зоркі?
DDoS-атака ідзе на сайты адразу некалькіх беларускіх СМІ. Магчыма, яна звязаная з шостай гадавінай народнага ўздыму 2020‑га і канферэнцыяй «Новая Беларусь», што адкрылася сёння66
Каментары