«Было зразумела, што і сюды дабяруцца». Ці будуць беларускія бізнэсмены выдаляць свае профілі з «Баймапкі»?
Следчы камітэт (СК) Беларусі заявіў, што ўстанавіў асобы больш за 1000 карыстальнікаў платформы «Новая Беларусь», і выставіў фігурантам абвінавачванні. Высветлілася, што гаворка пра праекты, якія былі зарэгістраваныя на «Баймапцы» — карце беларускага бізнэсу за мяжой. Прадпрымальнікі рэгістраваліся там як у каталогу, каб заявіць пра сябе і прыцягнуць патэнцыйных кліентаў-суайчыннікаў. Выданне Most пагутарыла з беларусамі, якія размяшчалі інфармацыю пра свае бізнэсы на платформе, і даведалася, што яны плануюць цяпер рабіць.
Фармальна «Баймапка» з'яўляецца іншай платформай. «Любы бізнэс, да якога прыйшлі, можа смела пацвердзіць, што нічога не парушае і не мае нічога агульнага з дадаткам «Новая Беларусь»/SVAE», — напісаў кіраўнік «Новай Беларусі» Павел Лібер.
Тым не менш тым, хто перажывае за сваю бяспеку, ён прапанаваў выдаліць свой бізнэс — на сайце «Баймапкі» ёсць для гэтага асабісты кабінет. Але прадстаўнікі бізнэсаў, з якімі звязаўся Most, паставіліся да такой ідэі стрымана.
«Эмацыйнай рэакцыі на падобныя злівы ўжо нуль»
Ганна (імя зменена) вядзе невялікі бізнэс па вырабе аксесуараў у Беластоку. Яна лічыць, што па польскім нумары тэлефона або працоўным профілі ў інстаграме беларускія сілавікі не змогуць яе ідэнтыфікаваць.
«Я ў Беларусь вяртацца не збіраюся, таму ніякую інфармацыю выдаляць з карты не буду. Гэтая навіна мяне ніяк не тычыцца. І яна кагосьці здзіўляе? Было зразумела, што рана ці позна яны і сюды дабяруцца.
Эмацыйнай рэакцыі на падобныя злівы ўжо нуль. Шчыра кажучы, я не бачыла эфектыўнасці сэрвісу. Таму не думаю, што там ёсць нейкая звышстатыстыка, здольная ў негатыўным ключы паўплываць на бізнэсменаў, якія размяшчалі там інфармацыю.
Беларусы, якія заказваюць у мяне вырабы, не ездзяць на радзіму. Мы з імі ў адной лодцы. Таму папярэджваць іх, што мой бізнэс, верагодна, дзесьці мог засвяціцца, няма сэнсу».
«Наш страх будзе толькі граць ім на руку»
Ян і Арцём развівалі ў Грузіі праект Liberty Drive — аўташколу, якая кансультавала па атрыманні правоў кіроўцы ў гэтай краіне і рыхтавала да здачы экзамену. Цяпер маладыя людзі ў Польшчы, а праект працуе толькі анлайн.
Ян кажа, што спачатку не было разумення, як рэкламаваць бізнэс, і партнёры зарэгістравалі яго на «Баймапцы». А цяпер ужо больш увагі патэнцыйных кліентаў прыцягваюць сацсеткі праекта.
Тым не менш, у выдаленні ўліковага запісу ён сэнсу не бачыць.
«Усё, што яны хацелі, яны ўжо скапіявалі сабе. А гэта будзе толькі патураць іх хацелкам. Наш страх будзе толькі граць ім на руку. Будуць сядзець і радавацца, што гэта запалохванне працуе».
Уладальнікі бізнесу разважаюць толькі пра тое, ці варта папярэджваць кліентаў, што яны рэгістравалі кампанію на «Баймапцы».
«Няхай кадэбэшнікі заходзяць да нас»
Аляксей развівае турыстычны бізнэс у Гданьску. Інфармацыя пра яго кампанію таксама ёсць на «Баймапцы». Але нядаўняя навіна беларуса не ўразіла.
«Ніякай пагрозы няма. Асабіста я не маю ніякіх стасункаў з Беларуссю, так што няхай яны робяць што захочуць. Не зусім разумею, што яны маюць на ўвазе, калі кажуць, што ўстанавілі карыстальнікаў, — там жа на мапцы і так ёсць уся інфармацыя, нават узломваць яе не трэба.
Лічу, што асноўная мэта навіны ад СК — запужаць і дэматываваць беларусаў, якія жывуць за мяжой. Гэта частка гульні беларускай дзяржавы, калі яна вядзе кампанію і з пашпартамі, і з правамі кіроўцы, каб зрабіць горш тым, хто выступіў супраць Лукашэнкі.
Я рэгістраваўся на «Баймапцы» нават не з-за кліентаў, а каб паказаць, што беларусы могуць самі існаваць за мяжой і рабіць цікавыя рэчы. Гэта як факт таго, што людзі могуць жыць без дапамогі дзяржавы — і ўсё ў іх добра атрымліваецца. Такі пасыл для тых, хто хацеў вярнуць беларусаў дадому, каб пасля пасадзіць іх у турму. Таму мой профіль застанецца там і надалей. Няхай кадэбэшнікі заходзяць да нас».
«Як быццам прымаеш у сябе вечны паток лайна»
У Варшаве Уладзімір развівае бізнэс, звязаны з нерухомасцю. Пра заяву СК ён раней не чуў — навіну даведаўся ад журналісткі Most.
«Я такім не цікаўлюся. Я жыву ў Польшчы і звяртаць увагу на Беларусь наогул не хачу. У Беларусі ўвесь час нешта ды здараецца. Сочыш за такімі навінамі — і як быццам прымаеш у сябе вечны паток лайна. А мне тры гады як расхацелася гэта рабіць.
Мне складана пракаментаваць тое, што здарылася. Шчыра кажучы, я наогул нічога не думаю з гэтай нагоды».
Каментары