Добрушскі фарфоравы завод — самы вялікі на прасторах былога СССР і адзіны ў Беларусі. Штогод тут выпускаюць больш за 20 мільёнаў кубкаў, талерак, сувеніраў, частка з якіх распісваецца ўручную мастакамі. Апошніх — усяго чацвёра, расказвае «Народная газета».
Святлана Гладчанка за змену ўручную распісвае па 25 кубкаў і сподачкаў. Яна працуе тут 37 гадоў. У 1989 годзе пайшла вучыцца на мастака, прайшоўшы досыць строгі конкурс.
«У сям'і маляваў толькі тата, ды і то для душы. З фарфорам наогул ніхто са сваякоў ніколі не працаваў. Адна я такая, хоць не адчуваю сябе асаблівай. Заўсёды цікава ствараць унікальныя працы, эксклюзіўныя заказы. Памятаю, як распісвалі вазы для падарункаў высокапастаўленым асобам. Вельмі шмат ручнога роспісу да гэтага часу заказваюць у Чэхіі».
Святлана расказвае, што з 1990-х пайшла мода на мінімалізм у роспісе, але цяпер зноў вяртаецца шырокамазковы жывапіс.
Пэндзлікі для мастакоў робяць выключна з вавёрчыных хвастоў. Асабліва тонкія лініі пазалоты наносяць спецыяльным пяром.
Фарбы для фарфору асаблівыя. Да прыкладу, кобальтавыя абпальваюцца чатыры разы і толькі затым зіхацяць золатам. Самага каштоўнага металу ў фарбе ўсяго каля 9%, да адпраўкі ў печ ён выглядае хутчэй карычневым. Абпал мяняе адценне і іншых фарбаў.
Каб перанесці малюнак на посуд, выкарыстоўваюць кальку. Плёначка прыкладваецца да малюнка, награваецца фенам, на яе пераносіцца малюнак з узору, а потым абколваецца невялікай іголкай на палачцы. Гатовая калька прыкладваецца да кубка і прыцярушваецца вугалем з мяшочка. Па гэтым вугальным контуры і арыентуецца майстрыха.
У 1970-х у СССР працавалі 54 такія заводы. Цяпер вялікія вытворчасці захаваліся толькі ў Добрушы і расійскім Дулёве.
На заводзе ў Добрушы задумваюцца аб папулярызацыі рэдкай прафесіі і ўжо сёлета арганізуюць першыя майстар-класы пад кіраўніцтвам мастакоў.
Цяпер чытаюць
Былы беларускі ваяр суткі катаваў свайго сябра, а пасля забіў сябе11
Каментары
Паступова, усё ж, старонка перагортваецца і прынцыпы з каштоўнасцямі сыходзяць на нейкі другі ці трэці план.
Дзесці 15 год таму сутыкнулся Вось крышталь з Гусь хрустальнага на падстаўке..лепшы
Так мабыць падстаўка адтуль але есць сумненне А вось крышталь з Беларусі Неман Вы налепкі б знялі ))) прыклалі рукі