Былы абаронца клубаў Нацыянальнай хакейнай лігі Джон Мішук памёр ва ўзросце 84 гадоў, паведамляе «Беларускі хакей».
Ён нарадзіўся 29 верасня 1940 года ў Налібаках (Стаўпеччына) як Ян Мішук. У 1943 годзе яго родную вёску Налібакі спалілі нацысты, а тых жыхароў, што засталіся жывымі, накіравалі на прымусовыя работы ў Германію. Пасля вайны многія сем’і з лагераў эмігравалі за акіян.
Бацька Яна пераехаў у Канаду ў 1950 годзе, а хутка забраў да сябе і ўсю сям’ю. Джон пачаў гуляць у хакей у 10 гадоў, тым не менш яму ўдалося прабіцца ў НХЛ, дзе ён правёў 237 матчаў на пазіцыі абаронцы ў складзе «Дэтройта», «Чыкага», «Філадэльфіі» і «Мінесоты».
Акрамя таго, на яго рахунку 214 сустрэч ва Сусветнай хакейнай асацыяцыі за «Мічыган Стэгс/Балтымар Блэйдс» і «Калгары Каўбояў». У гэтых гульнях ён запісаў на свой рахунак 72 (6+66) ачкі.
Пасля завяршэння кар’еры Мішук пабудаваў паспяховы бізнес у сферы грамадскага харчавання.
У 2019 годзе ён наведаў родныя Налібакі.
Каментары