Летась у Вільні ў беларусаў нарадзілася каля 100 дзяцей

Дактары галоўнай клінікі Вільні ў Сантарышках кажуць, што бываюць дні, калі кожны трэці нованароджаны ў іх бальніцы — не літоўскі грамадзянін. У асноўным гэта дзеці грамадзян Беларусі і Украіны, аднак часта ў Вільні нараджаюць грамадзянкі краін Сярэдняй Азіі і Афрыкі, піша Delfi.lt са спасылкай на TV3.lt.

Жыхары літоўскай сталіцы баяцца, што літоўцы могуць стаць тут меншасцю. Наэла з Камеруна нарадзіла ў Сантарышскай клініцы сваю дачку Крыстэль. Жанчына вучылася ва ўніверсітэце імя М. Ромера і жыве з сям’ёй у сталіцы.

«Я прыехала сюды вучыцца, скончыла вучобу, атрымала магчымасць тут працаваць. Вырашыла застацца», — распавяла журналістам Наэла.

Дактары радзільнага аддзялення Сантарышскай клінікі сказалі, што апошнім часам у іх з’явілася нямала замежніц. «Бываюць дні, калі кожная трэцяя пацыентка — не грамадзянка Літвы», — сказала загадчыца аддзялення Віргінія Палюліце.

Паводле даных Цэнтра рэгістра, штогод у Літве нараджаюць каля 500 замежніц. У мінулым годзе толькі ў Вільні нарадзіліся 265 не грамадзян Літвы. Найчасцей гэта дзеці ўкраінак і беларусак — прыкладна па 100. 26 дзяцей нарадзілі грамадзянкі Расіі.

«Ёсць парадзіхі з Кыргызстана, Намібіі, Нігерыі, Лівана, Пакістана», — сказала Палюціце.

Загадчык радзільнага аддзялення Віленскай гарадской бальніцы Эгідзіюс Якюнас сказаў, што становіцца ўсё больш парадзіх з далёкіх краін. «Калі 5 гадоў таму былі грамадзянкі Беларусі, 2 гады таму — украінкі, то цяпер — Індыя, Пакістан», — сказаў Якюнас.

У мінулым годзе ў Літве нарадзілася амаль 19 000 нованароджаных — амаль на 1000 менш, чым у 2023 годзе. Аднак тое, што нараджаюць не літоўкі, радуе не ўсіх, асабліва ў Вільні. Апытанне на вуліцах горада паказала, што людзі незадаволеныя.

• «Я стаўлюся адмоўна, нельга дазваляць прыезджым размнажацца. Чаму? Хочацца, каб у сталіцы Літвы жылі літоўцы».
• «Калі прыязджаюць спецыялісты — я за, але калі з’язджаюцца ўсялякія, з-за якіх расце злачыннасць, то не вельмі станоўча стаўлюся».

Гісторык Вітаўтас Алішаўскас сказаў, што тэндэнцыя з’яўлення замежнікаў непазбежная — гэта назіраецца і ў сталіцах іншых краін.

«Пытанне ў тым, ці захочуць людзі быць літоўцамі: чарнаскурыя, жоўтаскурыя, венгры, брытанцы. Іншае пытанне — што мы хочам рабіць для інтэграцыі гэтых людзей. Ці ставімся да іх як да слугаў, што выконваюць брудную працу», — задаецца пытаннем гісторык.

Віленчукоў асабліва турбуе, ці застанецца сталіца літоўскай.

• «Я нічога дрэннага не бачу, калі яны падмятаюць вуліцы і мыюць посуд».
• «Канечне, хацелася б, каб было больш літоўцаў».
• «Людзі, што прыязджаюць з іншых гарадоў, кажуць, што ў Вільні мала чуюць літоўскую мову, цяпер яе яшчэ менш, таму не магу сказаць, што гэта добра».

Гісторык кажа — цяпер Вільня самая літоўская за ўсю сваю гісторыю.

«Вільня ніколі раней не была такой літоўскай, як цяпер. Я прыехаў вучыцца ў Вільню ў 1975 годзе, дык тады ў грамадскім месцы дамовіцца па-літоўску было немагчыма», — узгадвае Алішаўскас.

Старшы навуковы супрацоўнік Цэнтра сацыяльных навук Данатас Бурнейка не хавае — Вільня становіцца рознакаляровай.

«У этнічным плане Вільня становіцца разнастайнай. Я думаю, у бліжэйшы час сітуацыя будзе, як у савецкі час — літоўцы не будуць большасцю ў сталіцы», — выказаў здагадку ён.

Цяпер у Вільні 67% літоўцаў, 15% палякаў і 10% рускіх. У міжваенныя гады ХХ ст. у Вільні было ўсяго 1% літоўцаў. Літоўцы ў Вільні на працягу некалькіх соцень гадоў былі меншасцю.

«Пачынаючы з часоў Гедыміна, які запрашаў майстроў з-за мяжы, з’явілася шмат людзей славянскага паходжання, русінаў — тое самае было ў XVIII стагоддзі, пасля эпідэмій у XVII ст.», — сказаў Алішаўскас.

Спецыялісты баяцца, што нядаўна прыбылыя замежнікі ў шматкультурнай Вільні будуць утвараць своеасаблівыя гета.

«У асноўным гэта не будуць самыя багатыя жыхары, значыць, яны будуць сяліцца ў пэўных месцах горада, у самых кепскіх, будуць утварацца нейкія гета», — лічыць Бурнейка.

• 2
• 0
• 2
• 5
• 0
• 1
• 0
• 0