Белы дом чакае адказу Ірана па ключавых палажэннях у найбліжэйшыя 48 гадзін.
ЗША і Іран блізкія да заключэння кароткага мемарандуму аб узаемаразуменні, які павінен зафіксаваць спыненне канфлікту на Блізкім Усходзе і вызначыць рамкі далейшых перамоваў па ядзернай праграме, паведамляе Axios са спасылкай на амерыканскіх чыноўнікаў і крыніцы, знаёмыя з працэсам.
Паводле суразмоўцаў выдання, Белы дом чакае адказу Ірана па ключавых палажэннях у бліжэйшыя 48 гадзін. Канчатковых дамоўленасцяў пакуль няма, аднак бакі, як адзначаецца, наблізіліся да пагаднення мацней, чым на папярэдніх этапах перамоваў.
Праект дакумента прадугледжвае прыпыненне ўзбагачэння ўрану Іранам, паэтапнае зняцце санкцый ЗША і разблакіроўку часткі замарожаных іранскіх сродкаў. Таксама абмяркоўваецца паступовая адмена абмежаванняў на суднаходства праз Армузскі праліў і зніжэнне ваеннай напружанасці ў рэгіёне. Паводле крыніц, асобны 30‑дзённы этап перамоваў для падрыхтоўкі больш дэталёвага пагаднення можа адбыцца ў Жэневе або Ісламабадзе. У гэты перыяд мяркуецца паступовае змякчэнне абмежаванняў з абодвух бакоў.
У межах меркаванага мараторыю на ўзбагачэнне ўрану разглядаюцца тэрміны ад 12 да 15 гадоў — раней Іран прапаноўваў пяцігадовы мараторый, а ЗША — 20-гадовы.
Таксама абмяркоўваюцца ўзмоцненыя інспекцыі Міжнароднага агенцтва па атамнай энергіі (МАГАТЭ), уключаючы магчымасць раптоўных праверак, і абавязацельствы Ірана не развіваць ядзерную зброю.
ЗША, згодна з праектам, могуць паэтапна змякчаць санкцыі і разблакіроўваць значныя аб’ёмы замарожаных іранскіх актываў. Абмяркоўваецца таксама магчымасць вывазу высокаўзбагачанага ўрану за межы Ірана.
Пры гэтым у Белым доме адзначаюць, што ўнутраная пазіцыя кіраўніцтва Ірана застаецца неаднароднай, што можа ўскладніць дасягненне канчатковых дамоўленасцяў. Канчатковае пагадненне паміж бакамі пакуль не дасягнута.
Каментары
Что изменилось ?
Похоже, следующие 25 лет будут такими же, до нового Трампа !