Хатняе заданне па фізкультуры і тлумачэнне паняцця «каляровая рэвалюцыя». Якія змены ў школах будуць у новым навучальным годзе
14 жніўня ў Мінску прайшоў агульнарэспубліканскі семінар-практыкум, прысвечаны падрыхтоўцы да 2025/2026 навучальнага года. На ім абмеркавалі гатоўнасць устаноў адукацыі да навучальнага года, змяненні ў праграмах і новаўвядзенні, якія пачнуць дзейнічаць з 1 верасня, піша БелТА.
Па словах намесніка міністра адукацыі Аляксандра Кадлубая, у больш чым палове школ і гімназій ужо падпісаныя або амаль падпісаныя пашпарты гатоўнасці. Завяршаюцца рамонты, правяраюцца бяспека і выкананне санітарных і тэхнічных нормаў. Больш за 90% рукапісаў новых падручнікаў перададзена на друкарні, частка накладу ўжо дастаўлена ў школы.
З новага навучальнага года ўводзяцца істотныя змены:
- колькасць урокаў фізкультуры павялічыцца да трох на тыдзень, каб змагацца з гіпадынаміяй і паляпшаць фізічную падрыхтоўку вучняў;
- у праграмы ўключаць гульнявыя віды спорту (валейбол, баскетбол, футбол), а ў старэйшых класах — гімнастыку на спартыўных снарадах;
- магчыма з’яўленне хатняга задання па фізкультуры, напрыклад, падцягванні, прыседанні, практыкаванні на прэс;
- тэорыя і практыка фізкультуры будуць вывучацца паралельна.
З 1 верасня таксама ўводзіцца:
- забарона карыстання мабільнымі тэлефонамі падчас урокаў (смартфоны будуць здавацца ў спецыяльныя шафы);
- абавязковы дзелавы стыль адзення для вучняў.
У новым навучальным годзе школьнікі атрымаюць 28 падручнікаў, у тым ліку два новыя.
Асаблівая ўвага — прадмету «Гісторыя Беларусі ў кантэксце сусветнай гісторыі», дзе каля чвэрці кнігі прысвечана незалежнай Беларусі, яе дасягненням, ролі Лукашэнкі, патрыятызму і «адзінству». Міністр адукацыі Андрэй Іванец адзначыў, што ўпершыню ў падручніку падрабязна апісаны 30-гадовы перыяд інстытута прэзідэнцтва, уключаючы тлумачэнне паняцця «каляровыя рэвалюцыі».
Для дзесяцікласнікаў навучальны год скончыцца 25 траўня, каб правесці вучэбна-палявыя зборы па патрыятычным, фізічным і працоўным выхаванні. У сельскіх школах, ліцэях і кадэцкіх вучылішчах з’явіцца магчымасць навучання кіраванню аўтамабілем як часткі прафесійнай падрыхтоўкі.
Працягваецца лічбавая трансфармацыя адукацыі: на Нацыянальным адукацыйным партале з’явяцца віртуальныя памочнікі для вучняў, а таксама факультатыў «Асновы кіравання квадракоптарам» з практыкай на трэнажорах.
Цяпер чытаюць
Арыштаваны дырэктар Палаца Рэспублікі, адзін з арганізатараў Марафона адзінства10
Каментары
І лепш пакуль без тэлефона, да таго часу, як Агат, Гарызонт і ААЦ не прыдумалі мабільны тэлефон са штучным інтэлектам, які ведае толькі 1 правільны падручнік.