Уладальнікаў замежных ДНЖ і Картаў паляка абавяжуць здаваць адбіткі пальцаў
Савет Міністраў прапанаваў папраўкі ў закон «Аб дзяржаўнай дактыласкапічнай рэгістрацыі», якія могуць закрануць тысячы грамадзян Беларусі. Імі прадугледжваецца ўвядзенне абавязковай дактыласкопіі — здачы адбіткаў пальцаў — для тых беларусаў, хто атрымаў замежнае грамадзянства ці дазвол на жыхарства за мяжой.
Калі законапраект будзе прыняты, людзі павінны будуць праходзіць дактыласкапічную рэгістрацыю пры афармленні ці абмене дакументаў, а таксама пры пастаноўцы на консульскі ўлік за мяжой. Выключэнні зробленыя толькі для дзяцей да 14 гадоў і пажылых людзей, старэйшых за 75 гадоў.
У тэксце законапраекта гаворыцца, што гэтыя палажэнні тычыцца тых, хто:
- атрымаў грамадзянства іншай дзяржавы;
- атрымаў дазвол на жыхарства ці іншы дакумент, які дае пэўныя льготы ці перавагі з-за палітычных, рэлігійных поглядаў ці нацыянальнай прыналежнасці;
- праінфармаваў пра гэта органы ўнутраных спраў або дыпламатычныя прадстаўніцтвы Беларусі.
Мяркуючы па фармулёўцы, новае правіла можа закрануць і ўладальнікаў «Карты паляка».
Улады патлумачылі, што такая мера неабходная для ўзмацнення кантролю, павышэння бяспекі і больш эфектыўнага выяўлення экстрэмісцкай дзейнасці ці злачынстваў. Фактычна гэта значыць стварэнне больш поўнага рэестру біяметрычных даных тых, хто мае сувязь з Беларуссю, але жыве за яе межамі або мае замежныя дакументы.
На гэты момант праект закона яшчэ абмяркоўваецца. Калі ён уступіць у сілу, новыя правілы стануць абавязковымі для ўсіх асоб, пазначаных у дакуменце.
Цяпер чытаюць
62‑гадовая бізнэсвумэн і мільянерка Ірына Цярэшчанка падзялілася гісторыяй свайго кахання з мужчынам, на 20 гадоў малодшым за яе8
Каментары