Беларускія фуры стаяць у шматкіламетровых чэргах на мяжы Расіі і Казахстана
Беларускія фуры сталі ў шматкіламетровых чэргах на мяжы Расіі і Казахстана. Гэта звязана з тым, што мытныя службы дзвюх краін узмацнілі кантроль і праверку грузаў. Па словах камерцыйнага дырэктара кампаніі «Інтэр-фрэйт» Дзмітрыя Самуськова, галоўнай прычынай узмацнення праверак сталі нявырашаныя пытанні па мытных тарыфах і рознагалоссі ў энергетычнай палітыцы, піша Office.Life.
Павышаная ўвага да ўсіх грузаў, якія едуць у Расію, прыводзіць да затрымкі паставак і росту выдаткаў на лагістыку. Калі фура трапляе на праверку з экспертызай, тэрмін дастаўкі можа павялічыцца ад двух тыдняў да двух месяцаў. Пры дробных парушэннях дакументацыі фуры адпраўляюць у горад Карабалык, што знаходзіцца за 70 км ад мяжы, для складання адміністрацыйнага пратаколу.
Казахстан лічыцца самым кароткім маршрутам для дастаўкі тавараў з Кітая ў Беларусь, і тарыфы там ніжэйшыя, але цяпер рызыкі пераважаюць перавагі. Дзмітрый Самуськоў раіць часова пазбягаць гэтага маршруту і выкарыстоўваць альтэрнатывы — праз Манголію або праз Забайкальск у Расію.
Акрамя таго, пры імпарце з Кітая патрабуецца поўны пакет дакументаў яшчэ да выезду кантэйнера з Кітая. Без іх тавары могуць вяртаць, што стварае дадатковыя выдаткі да $20 тысяч. Кітайскія сертыфікаты павінны быць у арыгінале, расійскія можна падаваць у выглядзе сканаў.
Каментары