Аксамітны сезон: дзе можна адпачыць і колькі давядзецца патраціць

Якія кірункі пляжнага адпачынку актуальныя гэтай восенню?

Па словах дырэктара турагенцтва Travel House Юрыя Суркова, адной з найбольш прывабных краін для адпачынку ў аксамітны сезон для беларусаў застаецца Турцыя.

— Да канца кастрычніка — пачатку лістапада ў Анталіі вельмі камфортнае надвор'е, а Міжземнае мора яшчэ цёплае. На курортах Чарнаморскага ўзбярэжжа будзе ўжо прахалодна, але да сярэдзіны кастрычніка тут можна няблага адпачыць, — кажа эксперт.

У Егіпет і Арабскія Эміраты можна смела адпраўляцца на адпачынак да канца лістапада. Таксама для пляжнага турызму ў аксамітны сезон падыходзяць Кіпр і Крыт, Сіцылія, паўднёвая частка Іспаніі (Коста-Бланка, Валенсія) і яшчэ Гаа (Індыя), дзе сезон пачынаецца з сярэдзіны кастрычніка.

— Сёлета кампанія «Белавія» арганізавала шэраг прамых рэйсаў з Мінска ў Кітай, В'етнам і Шры-Ланку, а таксама анансавала рэйсы ў Тайланд. Гэтыя краіны таксама выдатна падыходзяць для адпачынку ў аксамітны сезон, — адзначыў Юрый Суркоў.

Топ авіятураў і кошт адпачынку па-за Шэнгенскай зонай

Па-ранейшаму найбольш запатрабаванымі кірункамі падарожжаў з магчымасцю адпачыць на марскіх курортах застаюцца Турцыя, Егіпет і Арабскія Эміраты.

Так, тур у Турцыю на дваіх з пералётам чартарным рэйсам і размяшчэннем у трохзоркавым гатэлі на 6 начэй без харчавання абыдзецца ў кастрычніку ад 1198 еўра па курсе Нацбанка, а за адпачынак у Шарм-эль-Шэйху на дваіх за тыдзень давядзецца выкласці не менш за 2100 долараў з улікам харчавання.

Прыкладна ў столькі ж абыдзецца тыдзень знаходжання на курорце Шарджа ў ААЭ ў двух-трохзоркавым гатэлі (сняданкі ўключаны).

Чартарныя рэйсы на кітайскі востраў Хайнань, які абмываецца Паўднёва-Кітайскім морам, тураператары прапануюць па цане ад 5298 долараў (па курсе Нацбанка) на дваіх. У гэту суму ўваходзяць кошт чартара і 8 начэй у чатырохзоркавым гатэлі са сняданкамі.

Прыкладна на тысячу долараў танней абыдзецца тур на дваіх у В'етнам (востраў Фукуок) з вылетам з Мінска і пражываннем у трохзоркавым гатэлі (10 начэй, сняданкі ўключаны).

Тым, хто хоча адпачыць на Шры-Ланцы, даступныя туры з вылетам з Мінска па цане ад 2637 долараў на дваіх. У кошт уваходзяць чартар і пражыванне ў двухзоркавым гатэлі на курорце Хікадува (7 начэй, без харчавання).

Адпачынак у Тайландзе пакуль даступны з вылетам з Масквы — такое падарожжа на дваіх абыдзецца мінімум у 1560 еўра па курсе з пражываннем у трохзоркавым гатэлі на востраве Пхукет (9 начэй, сняданкі ўключаны).

Топ авіятураў у краіны Шэнгенскай зоны

Дастаткова папулярным у беларусаў з'яўляецца адпачынак на Кіпры, які абыдзецца танней, чым у многіх іншых краінах. Аднак ёсць нюанс: трапіць без візы можна толькі на турэцкую частку вострава. Для адпачынку ў Рэспубліцы Кіпр спатрэбяцца нацыянальная або шэнгенская віза.

Беларускія тураператары прапануюць адпачынак (з вылетам з Мінска) у такіх гарадах, як Ая-Напа, Протарас, Пафас, Ларнака па цане ад 1860 долараў (па курсе Нацбанка) на дваіх з пералётам і пражываннем у двухзоркавым гатэлі (5 начэй, без харчавання).

Пры наяўнасці шэнгенскай візы ў кастрычніку можна адпачыць на курортах Іспаніі — кошт тура з вылетам з Вільні абыдзецца ад 4136 беларускіх рублёў на дваіх (7 начэй у чатырохзоркавым гатэлі са сняданкамі і вячэрамі).

Таксама ўладальнікам шэнгену даступны пляжны адпачынак на востраве Сіцылія. Такі тур з вылетам з Вільні абыдзецца мінімум у 5800 рублёў на дваіх (8 начэй, сняданкі ўключаны).

Аўтобусныя туры: куды можна адправіцца?

Варыянтаў для тых, хто аддае перавагу падарожнічаць аўтобусам, значна больш. Аднак варта ўлічваць, што з улікам затораў на межах і вялікіх адлегласцей такая паездка можа аказацца даволі цяжкай.

Без візы ў кастрычніку можна з'ездзіць у Грузію (курорты Батумі, Кабулеці). Праўда, не варта разлічваць на цёплае мора і сонца, бо тэмпература паветра ў гэты час рэдка падымаецца вышэй за плюс 20 градусаў. Паездка на 9 дзён на моры (без уліку дарогі) абыдзецца ў сярэднім каля 400 долараў па курсе на чалавека. У гэту суму звычайна ўключаюцца экскурсіі і сняданкі.

Таксама без візы даступны экскурсійны тур у Абхазію (выезд з Мінска) з адпачынкам на моры ў Сухумі. Такая паездка абыдзецца ў 1048 беларускіх рублёў на чалавека (10 начэй).

Пры наяўнасці шэнгенскай візы ў кастрычніку можна адправіцца ў незвычайны аўтобусны тур у Партугалію з адпачынкам на акіянскім узбярэжжы і экскурсіямі па маршруце руху (Польшча, Германія, Іспанія, Швейцарыя). Кошт 14‑дзённага падарожжа складае ад 2646 рублёў на чалавека.

Таксама даступныя аўтобусныя экскурсійныя туры ў Італію з адпачынкам на моры (Сарэнта, Рыміні). Кошт — ад 1838 беларускіх рублёў на чалавека за 12 начэй.

• 0
• 1
• 0
• 0
• 0
• 1
• 0
• 0