Масква заявіла, што Кіеў рыхтуе правакацыю: хочуць закінуць у Польшчу дыверсійную групу з Палка Каліноўскага
Служба знешняй разведкі Расіі (СВР) распаўсюдзіла заяву, у якой сцвярджаецца, што ўкраінскі бок рыхтуецца перакінуць дыверсійна-разведвальную групу ў Польшчу. У яе склад, паводле СВР, могуць увайсці байцы беларускага Палка Каліноўскага і расійскага Легіёну «Свабода Расіі», якія ваююць на баку Украіны. Украінскі бок хутка адрэагаваў на гэта.
Расійская выведка заяўляе, што мэта — «правакацыя», у тым ліку магчымая імітацыя атакі на аб’екты крытычнай інфраструктуры Польшчы. У СЗВ сцвярджаюць, што нібыта і польскія спецслужбы ўцягнутыя ў падрыхтоўку сцэнара разам з украінскай выведкай.
«Кіеўскі рэжым пасля арганізаваных ім правакацый з БПЛА ў паветранай прасторы Польшчы і Румыніі не пакідае спроб уцягнуць еўрапейскія краіны НАТА ва ўзброенае супрацьстаянне з Масквой. У прапрацоўцы чарговая правакацыя. Гэтым разам інтрыга павінна разгортвацца вакол закінутай на польскую тэрыторыю дыверсійна-разведвальнай групы, якая нібыта складаецца з ваеннаслужачых спецпадраздзяленняў Расіі і Беларусі. Кандыдаты для ўдзелу ў інсцэніроўцы падабраныя. Гэта баевікі, якія ваююць на баку УСУ, з «Легіёна «Свабода Расіі» і беларускага «палка імя К. Каліноўскага», — гаворыцца ў заяве СВР.
Паводле сцэнара СВР, пасля «выяўлення і нейтралізацыі» ДРГ члены групы выступяць перад СМІ і дадуць прызнальныя паказанні, «выкрываючы Расію і Беларусь у спробе дэстабілізацыі абстаноўкі ў Польшчы».
Афіцыйны Кіеў рэзка і хутка абверг гэтыя абвінавачванні. У Цэнтры па барацьбе з фэйкамі пры Радзе нацыянальнай бяспекі і абароны Украіны заявілі, што насамрэч менавіта Расія можа рыхтаваць падобную правакацыю з мэтай дэстабілізацыі сітуацыі на мяжы Польшчы і выпрабавання рэакцыі краін НАТА.
Кіраўнік Цэнтра Андрэй Каваленка заявіў:
«Нарышкін і СВР РФ фактычна анансавалі ўласныя планы. Галоўная мэта — праверка рэакцыі Альянсу, а таксама спроба паўплываць на грамадскую думку ў Еўропе, каб напалохаць і знізіць узровень падтрымкі Украіны».
Цяпер чытаюць
Крык душы Бяспалава пра Ціханоўскага: Ён ператвараецца ў Лукашэнку 2.0, гэта траянскі конь66
Каментары