Брытанская карпарацыя прынесла выбачэнні за выпуск праграмы «Панарама», у якім яна склеіла два фрагменты прамовы Трампа 6 студзеня 2021 года, у дзень штурму Капітолія, але адмовілася плаціць кампенсацыю.
«Мы прызнаём, што наш мантаж ненаўмысна стварыў уражанне, быццам мы паказвалі адзін бесперапынны фрагмент прамовы, а не вытрымкі з розных яе частак, і што гэта стварыла памылковае ўражанне, нібыта прэзідэнт Трамп заклікаў да гвалтоўных дзеянняў», — гаворыцца ў заяве «Бі-бі-сі».
Юрысты Трампа раней пагражалі падаць пазоў да «Бі-бі-сі» на мільярд даляраў, калі карпарацыя не апублікуе абвяржэнне, не прынясе выбачэнні і не выплаціць кампенсацыю. Паводле слоў прадстаўніка «Бі-бі-сі», старшыня Рады карпарацыі Самір Шах асобна адправіў асабісты ліст у Белы дом, даўшы зразумець прэзідэнту Трампу, што «Бі-бі-сі» шкадуе пра мантаж прамовы прэзідэнта, але «катэгарычна не згодная» з тым, што існуюць падставы для пазову аб паклёпе.
Пасля скандалу з мантажом прамовы Трампа пра адстаўку абвясцілі гендырэктар «Бі-бі-сі» Цім Дэйві і кіраўніца навінавага падраздзялення Дэбара Цёрнэс.
Праграма «Panorama» змантавала дзве часткі прамовы Трампа такім чынам, каб склалася ўражанне, быццам ён адкрыта падбухторваў да беспарадкаў у Капітоліі ў студзені 2021 года. На гэтым фоне лідар апазіцыйнай Кансерватыўнай партыі Вялікабрытаніі Кемі Бадэнак заклікала да адставак у «Бі-бі-сі».
Каментары