Белстат прапануе зрабіць удзел у перапісе насельніцтва абавязковым
Белстат прапануе змяніць закон аб перапісе насельніцтва і зрабіць удзел у ім абавязковым для ўсіх грамадзян. Адпаведны праект закона 14 лістапада вынесены на грамадскае абмеркаванне.
Як тлумачаць аўтары законапраекта, новыя праўкі павінны зрабіць перапіс больш эфектыўным і нібыта наблізіць яго да міжнародных нормаў і рэкамендацый.
Галоўнае новаўвядзенне, якое прапануюць увесці — абавязак грамадзяніна не толькі не перашкаджаць перапісу, як пазначана ў законах цяпер, але і абавязкова ўдзельнічаць у ім і падаваць праўдзівыя звесткі. Пры гэтым асобнай адказнасці за адмову ўдзельнічаць у перапісе ў дакуменце не прадугледжана — у ім застаецца толькі агульная фармулёўка, што парушэнне заканадаўства цягне адказнасць, устаноўленую законамі.
Белстат таксама прапануе знізіць узрост, з якога чалавек можа самастойна запаўняць перапісныя лісты, да 15 гадоў. Гэта патлумачылі тым, што падчас перапісу 2019 года ўзнікалі цяжкасці са студэнтамі і падлеткамі, якія жывуць асобна ад бацькоў, але па законе яшчэ не паўналетнія.
Акрамя таго, законапраект прадугледжвае новы спосаб удзелу ў перапісе — праз інтэрнэт з дапамогай спецыяльнай праграмы. Раней інфармацыю можна было падаць толькі пры асабістым апытанні па месцы жыхарства або на перапісных участках.
Абмеркаванне законапраекта будзе працягвацца да 23 лістапада 2025 года.
Цяпер чытаюць
Работнікам Цэнтра алімпійскай падрыхтоўкі па фрыстайле забаранілі ісці на пахаванне Мікалая Казекі15
Работнікам Цэнтра алімпійскай падрыхтоўкі па фрыстайле забаранілі ісці на пахаванне Мікалая Казекі
У Беларусі зацвердзілі правілы эвакуацыі каштоўнасцяў на выпадак вайны: цэглу з Брэсцкай крэпасці з надпісамі будуць ратаваць перш за карціны Шагала і Суціна1515
Каментары